Dios kimelaua ma kiyekteneuakan
65
Tejua noDios, yejuan tinemi ipan on tepetl Sión,¡mitsmelaua ma mitsyekteneuakan,
niman mitsmelaua ma mitsmakakan tlen mitsprometerouiliaj,
2 pampa tejua titechkaki ipan toueyikatsajtzilis!
Nochi tlaltikpaktlakatl uajlau motech.
3 Maski miyek tlajtlakojli tikpiyaj,
tejua titechtlapojpoluiya.
4 Sanoyej kipiyaj paktli
on yejuan tejua yotikintlapejpenij
para ma chantitij mochan, ipan motiopan.
¡Ipan mochan tikpiyaj nochi,
xitlaj techpoloua!
¡Xitlaj techpoloua ipan moyektiopan!
5 Tejua toDios niman toTemakixtijkau,
titechnankilia ikan uejueyi tetlatlachalistin.
Nochi tlaltikpaktlakatl kitlalia iyojlo motech
maski nemi hasta kampa ontlantok on mar.
6 Tejua, ikan mochikaualis niman mopoder otikinchijchiu on tepemej.
7 Tejua tikteltia on mar para makasa ma koxoni,
niman tejua tikteltia on tlauejli ipan on kalpanmej.
8 Hasta on yejuan chantij kampa ontlantok in tlaltikpaktli,
kimojkaitaj on uejueyi tetlatlachalistin yejuan tikchiua.
Desde kampaka ikisayan tonaltsintli
hasta kampaka ikalakiyan,
tejua tikchiua para sanoyej ma pakatsajtsikan.
9 Tejua ticuidaroua in tlaltikpaktli;
ipan titlakiauitia para ma tlatlaki.
Ikan miyek atl de on ayajtoktsitsimej,
tejua tiktlakitia on trigo.
¡Tejua tikuektlalia on tlajli para ma kitôkakan!
10 Tejua tiktoyaua miyek atl ipan on kuentin,
niman tikimpatla on tlaltsontemej.
Tikyemanilia on tlajli ikan miyek kiautli,
niman tiktiochiua ikan nochi on tlen tlaki.
11 Cada itlamiyan xipan,
tiktemiltia tokueskomauan ikan miyek motlatiochiualis,
ikan on moxtli, titlakiauitia para kuajli ma tlatlaki.
12 On sakatl kualtsin xoxouiya ipan on xalpatlajkan,
niman on tepemej kualtsin notlakentiaj
ikan on miyek xochitl.
13 Ipan on sakayoj sa tlatentok ikan borregos,
niman ipan on ixtlauatl sanoyej tlatlaktok ikan trigo.
¡Nochi tlakatl, tsajtsij niman nokuikatiaj ikan paktli!