Sanoyej tetlatlachaltij nochi on tlen Dios kichiua
66
Nochimej yejuan nenchantij ipan in tlaltikpaktli,xkuikatlalikan Dios ikan paktli.
2 Xkueyiteneuakan iyektokatsin;
xkuikatlalikan ikan yekteneualistli.
3 Xkijlikan Dios:
"Sanoyej tetlatlachaltij nochi on tlen tikchiua.
Ikan moueyipoder, tikintlani on motlauelikniuan.
4 Nochi tlaltikpaktlakatl mitsmauistilia,
niman kuikatlalia moyektokatsin."
5 ¡Xuajlakan niman xkitakan nochi on tlen Dios yokichiu!
¡Xkitakan on uejueyi tetlatlachalistin
yejuan yokichiu topampa tejuamej!
6 Okitlapoj on Mar Rojo para okitlalij sen ojtli uaki,
niman okuats on río Jordán
kampa opanokej on toachtojtajuan.
¡Ma tipakikan tej, ipampa nochi on tlen Dios yokichiu!
7 Yejua tlamadaroua ikan ipoder para nochipa.
Yejua nochipa tlachixtikaj ipan naciones,
para on yejuan xipan teitaj maka uelis kixnamikiskej.
8 ¡Nemejuamej naciones, xyekteneuakan toDios!
¡Ma kakisti ken nenkuikatlaliaj ikan yekteneualistli!
9 Ijki ma tichiuakan
pampa yejua cuidaroua tonemilis,
niman xtechkauilia ma tiuetsikan.
10 Tejua toDios yotitechtlatlatak;
yotitechchipau ken kichipauaj on plata ikan tlitl.
11 Otitechkauilij ma tiuetsitij kampa otechtlatlalilijkej;
sanoyej yotitechtlajyouiltij.
12 Otitechtekauilij topan ma cholokan on totlauelikniuan.
Otipanokej ipan atl niman ipan tlitl,
pero aman yotitechkixtij kampa titlajyouiyayaj
niman otitechtlalij ipan sen tlajli kampa nochi onkaj.
13 Niman aman niuajlau ipan moueyitiopan
para nimitsmakas on uentli yejuan nochi tlatla,
para ijkon tlamis nikchiuas on promesas
14 yejuan onikchiu mixpan
ijkuak sanoyej nitlajyouiyaya.
15 Nimitsmakas uentli yejuan nochi tlatla
ikan on yolkej yejuan tojtomajkej.
Nimitsuentlalilis toros, chivos, niman borregos.
16 ¡Nochimej nemejuamej yejuan nenkitlakaitaj Dios,
xuajuiyan, niman nemechijlis nochi on tlen Dios yokichiu nopampa!
17 Nejua oniktsajtsilij chikauak para ma nechpaleui
niman onikyekteneu ijkuak oniknots.
18 Tla nejua xchipauak yeskia noyojlo,
toTEKO xnechkakiskia.
19 ¡Pero yejua onechkak,
niman onechnankilij ipan noueyikatsajtsilis!
20 ¡Ma kiyekteneuakan Dios,
yejuan onechkak ipan nooración
niman onechititij itetlajsojtlalis which never ends.