Sen ueyikatsajtsalistli para niktlajtlanilia Dios ma nechcuidaro
64
NoDios, xkaki tlinon nechajmana;xnechcuidaro de on notlauelikniuan
yejuan sanoyej nechtlauelitaj.
2 Xnechiyana de on xompayejyeuamej
yejuan kinemiliaj nechchiuiliskej tlen xkuajli.
Xnechmanaui de on yejuan sanoyej xkuajli tlinon kitechiuilijtenemij,
3 yejuan sanoyej tlateki innenepil ken itlaj espada,
niman intlajtol temiktiaj kenon flechas
yejuan kipiyaj veneno.
4 Yejuamej xitlaj kimakajsij.
Kampa niyantokej, san uajnonextiaj
para kinmotlaj on yejuan xitlaj tlajtlakojli kipiyaj.
5 Kinemiliaj xakaj kinta
ijkuak noyoleuaj kichiuaskej tlen xkuajli
niman ijkuak kijtouaj ken tetlatlaliliskej.
6 Ikan miyek cuidado kinejnemiliaj
kenijki kichiuaskej tlajtlamach tlen xkuajli,
niman kinemiliaj ika kipiyaj sen plan
yejuan kuajli kisas.
Yejuamej kinemiliaj ika xakaj kimpanextis.
7 Yejua ika, Dios kinmotlas ikan iflechas,
kinmotlas ijkuak yejuamej xkimajmatstokej.
8 Sano ika on intlajtol uetsiskej,
niman on yejuan kintaskej, inka uetskaskej.
9 Kemaj ijkuakon, nochimej kitlakaitaskej Dios,
niman kiteijliskej nochi on uejueyi tlajmach tlen yejua kichiua,
niman ijkon, nochimej kajsikamatiskej on tlen Dios yokichiu.
10 On tlakatl yejuan kuajli iyojlo, pakis itech toTEKO,
niman kinekis niyanas san yejua itech.
Niman nochimej on tlakamej yejuan yolchipajkej iminyolika nemiskej.