Dios, san yejua kitemaka nochi paktli
63
¡Ay Dios, tejua tinoDios!Sanoyej nimitstejtemoua
ken ijkuak niktejtemoua atl ijkuak sanoyej namiki.
Ikan nochi noalma nikneki nimitsnextis,
ijkon ken niknekiskia atl ipan sen tlaluaktli kampa xonkaj atl.
2 ¡Nikneki nimitsitas ipan moyektiopan,
kampa nikitas mopoder niman moueyilis,
3 pampa motetlajsojtlalis yejuan xkaman tlamis
más ueyi kijtosneki xken on nemilistli!
Ikan nokamak nimitskuikatlalis;
4 ipan nochi nonemilis nimitsyekteneuas,
niman ijkuak ninoueyikatsajtsalis nikintelketsas nomauan.
5 Sanoyej noyolika ninokauas,
ken ijkuak se miyek yokikuaj on uelik tlakuajli,
niman ikan nokamak nimitsyekteneuas ikan paktli.
6 Tlayoua ijkuak yoninotekak, nimitselnamiki,
niman nochi tlayoua nitlanemilia motechkopa,
7 pampa tejua tinechpaleuiya.
¡Nejua sanoyej nipakanemi
pampa tejua tinechmanauiya ikan momastlakapaluan!
8 Nochi noalma, san sekan mouan nemi;
moyekma xnechmakaua.
9 Yejuan kinekij nechmiktiskej onuetsiskej ijtik on tlalkontli.
10 ¡Yejuamej kinmiktiskej ikan espada,
niman kinkuaskej on lobos!
11 Pero on rey pakis itech Dios.
Nochimej on yejuan notlajtolmakaj ikan itokatzin Dios,
nokuikatiskej ikan yekteneualistli,
pero on yejuan tlakajkayauaj, kinkamatsakuaskej.