Dios san yejua itech ueli titiyanaj
62
Nejua, san itech Dios niknextia yolseuilistli,pampa san yejua ueli nechmakixtia.
2 San yejua ueli nechmakixtia niman nechmanauiya.
Xakaj uelis nechtlanis, pampa yejua nechiyana.
3 ¿Hasta kamanon más nennechuijsokiskej
niman nennechtlajkalisnekiskej, ken sen tepantli kitlajkalij
noso ken sen tepanchinantli yejuan ye uetstikaj?
4 Nemejuamej san nenkinemilijtokej nennechtlajkaliskej;
sanoyej nenkuelitaj nentlakajkayauaj.
Ikan nemokamak sanoyej kuajli nennechnotsaj,
pero ipan nemoyojlo, nennechuijuikaltiaj.
5 Nejua, san itech Dios niknextia yolseuilistli,
pampa notlamachalis onkaj san yejua itech.
6 San yejua ueli nechmakixtia niman nechmanauiya.
Xakaj uelis nechtlanis, pampa yejua nechiyana.
7 Dios yejua nechmakixtia,
niman yejua kichiua para ma nechtlakaitakan.
Dios nechmanauiya niman nechiyana.
8 ¡Nochimej yejuan nenikoneuan Dios,
nochipa xtlalikan nemoyojlo yejua itech!
¡Xkijlikan nochi tlinon mechajmana,
pampa Dios yejua techiyana!
9 Nochimej on tlaltikpaktlakamej, mayankej
niman ricos, ken itlaj ajakatl yejuan san panoua.
Tla kintemachiuaskej san sekan,
kitaskej ika yejuamej xyetikej.
10 Maka nentlakajkayauaskej para nenkitekuiliskej tomin,
nion maka nenkinekiskej nentlachtekiskej.
Tla kamanian onenricojtikej,
maka nenkitlaliskej nemoyojlo ipan on tomin.
11 Nejua miyekpa yonikak on tlen Dios okijtoj.
Okijtoj ika yejua nochi ueli kichiua,
12 niman on tetlajsojtlalistli san yejua iyaxka.
No okijtoj ika yejua kitlaxtlauilia cada se tlinon kichiua.