Sen ueyikatsajtsilistli para ipaleuilis Dios
60
Tejua noDios, ikan motlauel yotitechtlauelkau,niman xok ueli titomanauiyaj,
pero timitstlajtlaniliaj, oksejpa xtechpaleui ma titomanauikan.
2 Tejua otikchiu ma olini in tlajli, niman ma tsayani,
pero timitstlajtlaniliaj oksejpa xtsakua pampa ye xotontiu.
3 Motlapejpeniluan sanoyej yotikintlajyouiltij.
Yejua ika sa ixiuintij ken tlauankej.
4 On yejuan mitstlakaitaj, otikinmakak sen señal para cholojteuaskej
niman ijkon xokiminmotlakej ikan on arcos tlaminaltin.
5 ¡Xtechnankili! ¡xtechmakixti ikan mopoder!
¡Xtechmakixti tejuamej yejuan titechtlajsojtla!
6 Dios ijkin okijtoj ipan iyektiopan:
"¡Ikan miyek paktli nikinxelouilis nokoneuan
on tlajli Siquem niman on ixtlauatl Sucot!
7 On ueyitlalpan de Galaad niman on ueyitlalpan de Manasés nejua noyaxkauan.
Efraín ken yejua casco yejuan ika nomanauiyaj nokoneuan,
niman Judá ken yejua notopil yejuan ika nitlamandaroua.
8 On ueyitlalpan Moab ken sen ajpastli
kampa ninomajtekiya.
Ipan on tlajli Edom nikontlajkalis nokak,
para nikteititis ika on ueyitlalpan noyaxka.
¡Chikauak nitsajtsis pampa nikintlanis on filisteos!"
9 ¿Akinon nechuikas ipan on ueyikalpan
yejuan tepanyeualtsakutikaj?
¿Akinon nechyekanas hasta ne Edom?
10 Pampa tejua noDios yotitechtlalkauij,
¡xok tiau iminuan tosoldados ijkuak ontlauijsokij!
11 Xtechpaleui ma tikinmixnamikikan on totlauelikniuan,
pampa maski in tlaltikpaktlakamej techpaleuiskej,
sanenkaj yes.
12 Ikan itlapaleuil toDios, titetlaniskej;
¡yejua kinkuejkuechtilis on totlauelikniuan!