ToTEKO yejua techmanauiya
59
NoDios, xnechmanaui de on notlauelikniuan;xnechiyana para maka nechuijsokiskej.
2 Xnechmanaui de on yejuan kitechiuilijtinemij tlen xkuajli;
maka tinechtekauilis ma nechmiktikan,
3 pampa on tlakamej xompayejyeuamej.
Yejuamej kichaj para nechmiktiskej.
Nejua noTEKO, xnixompayejyeua mixpan,
nion xitlaj tlajtlakojli nikchiua.
4 Pero maski xitlaj nikchiua tlen xkuajli,
kinekij nechmiktiskej.
¡Xtlacha noTEKO!
¡Xkita tlinon nopan nochiua!
¡Xnechpaleui!
5 Tejua noTEKO,
yejuan nochi ueli tikchiua,
yejuan tiiDios Israel,
xtlacha niman xkincastigaro
on yejuan xmitsneltokaj.
Maka xkinmikneli on xompayejyeuakej tepannokuepkej.
6 Yejuamej uajlauij ijkuak tlayoua,
para kistinemij ipan in ueyikalpan
niman tlakuakuajtinemij ken chichimej.
7 Sanoyej tlamach kijtouaj tlen xkuajli.
Ipan inkamak kisa tlen sanoyej tekualanij,
niman kijtouaj: "¡Xakaj techkaki!"
8 Pero tejua noTEKO, san tikinuejuetskilia;
tejua tikimpinajtis on yejuan xmitsneltokaj.
9 Motech tejua noDios, niktlali nochi noyojlo,
pampa tejua tinechiyana niman tinechmanauiya.
10 On Dios yejuan nechtlajsojtla nechpaleuis.
Niman nechkauilis nikintas
ijkuak kintlanis notlauelikniuan.
11 Tejua noTEKO, yejuan titechmanauiya,
maka xkinmikti on notlauelikniuan,
para nokoneuan xnimantsin kelkauaskej.
Xkinchajchayaua ikan mopoder niman xkintlani.
12 Yejuamej tlajtlakouaj ika on tlen kijtouaj.
Yejua ika tej, sano yejuamej ma nopinajtikan
pampa noueyimatij niman tlakajkayauaj
ijkuak notlajtolmakaj.
13 ¡Xkinmikti, xkinmikti ikan motlauel!
¡Ma popoliuikan!
¡Ijkuakon, nochimej kimatiskej ika tejua tiDios
yejuan titlamandaroua ipan nochi Israel
niman ipan nochi in tlaltikpaktli!
14-15 Tlayoua notlauelikniuan nokuepaj,
kenon chichimej uajtlakuakuajtiuij,
niman kuajtejtemouaj tlakuajli ipan in ueyikalpan,
pero kuaochokaskej pampa xitlaj kinextiskej.
16 Pero nejua, nimitskuikatlalis ijkuak kualkan;
nikteijlis ika tejua nochi ueli tikchiua,
niman sanoyej titechtlajsojtla ikan motetlajsojtlalis
yejuan xkaman tlamis.
Tejua tinechmanauiya niman tinechiyana
ijkuak nimojkanemi.
17 Nimitskuikatlalis noDios, para nimitsyekteneuas,
pampa tejua tinechiyana niman tinechmanauiya.
¡Tejua tiDios yejuan tinechtlajsojtla!