Sen ueyikatsajtsilistli para Dios ma kincastigaro on xkuajkualtin tlakamej
58
Nemejuamej yejuan nenteyolkuitijkej,¿melauak nenchipajkatekitij?
¿Nenkijtouaj tlen melauak ijkuak nentetlajtlakolmakaj?
2 ¡Ka! Yej nentetlajtlakolmakaj maski se xkipiya tlajtlakojli.
Niman nenkichiuaj para ma onya tlauelîjlotl ipan nemopaís.
3 On xompayejyeuamej, ye ijkej desde ijtik iminnanaj.
On yejuan tlakajkayauanij, ixpoliuij ijkuak uajtlakatij.
4 Yejuamej kenon kouamej yejuan sanoyej kipiyaj mikapajtli.
Yejuamej kenon kouatl yejuan xkineki kakis,
5 ken tlatsostona on tlakatl
yejuan ueli kinsepoua on kouamej.
6 Tejua noDios, ¡xkintlanxixini!
Tejua noTEKO, ¡xkintlanyojyopeua kenon tekuanimej leones!
7 Ma popoliuikan, kenon atl
yejuan toyaui ipan tlaluaki;
ma uakikan, kenon xojtli yejuan ipan chojcholouaj;
8 ma pâtikan, kenon yolki tsinakatekojkon
yejuan pâtitiu ijkuak noteuilana;
¡ma mikikan kenon konetsintli yejuan nimantsin miki
ijkuak tlakati,
niman xkaman kita tlastajlotl!
9 Dios kimpopolos nochimej,
kokonej niman ueuentsimej;
kimpopolos isijkapan ken ijkuak xotla
sen kontli ipan on uitstli yejuan tlatla.
10 Niman on yolchipajkej pakiskej
ijkuak kitaskej ika Dios yokintlakuepiltij on xompayejyeuamej,
niman yaskej konchojcholoskej inyesyo on xompayejyeuamej.
11 Kemaj yejuamej ijkin kijtoskej:
¡Tlakaj melauak kiseliaj tlen kuajli yejuan yolchipajkej!
¡Melauak nemi sen Dios
yejuan kitlaxtlauilia cada se tlen kichiua ipan in tlaltikpaktli.