Sen ueyikatsajtsilistli para kitlajtlaniliaj itlapaleuil Dios
57
Xnechikneli noDios;xnechikneli pampa motech tejua nikneki ninomanauis.
Xnechiyana ikan momastlakapaluan,
ijkon ken sen kuanaka kinmiyana ikoneuan
hasta kaman panoua on tlen temojtij.
2 Ninoueyikatsajtsilis itech on Dios
yejuan más ueyixtikaj,
on Dios yejuan nechpaleuiya ipan nochi.
3 Yejua, nochipa nechcuidaros desde ne iluikak,
niman nechmanauis de on yejuan nechtlaueltotokatinemij.
¡Dios nochipa nechmakas itetlajsojtlalis
yejuan xkaman tlamis,
niman nochipa kichiuas on tlen kiprometeroua!
4 Nejua, ninemi intsajlan on yejuan sanoyej tlauelejkej,
kenon leones yejuan tekuanimej.
Intlanuan tlatekej ken itlaj lanzas niman tlaminaltin,
niman innenepil ken itlaj espada yejuan sanoyej tlateki.
5 Tejua noDios, más tiueyixtikaj ipan on cielo.
¡Moueyilis kitemiltia nochi in tlaltikpaktli!
6 On notlauelikniuan onechtlatlalilijkej ipan noojui,
niman on sanoyej onechajman.
Okitlalijkej sen pozo para ompa ma niuetsiti,
pero yej, yejuamej ompa ouetsitoj.
7 NoDios, nochi noyojlo niktlalia motech
niman nimitskuikatlalis ikan yekteneualistli.
8 Xtlacha noalmajtsin
para nitlatsotsonas ikan arpa niman salterio.
¡Ninokuiteuas uejkakualkan para nitlatsotsonas!
9 Nimitsyekteneuas noTEKO ixpan nochi tlakatl,
nimitskuikatlalis inmixpan on naciones.
10 Ijkon nikchiuas pampa on motetlajsojtlalis
yejuan xkaman tlamis sanoyej ueyi,
hasta ajsi ipan on cielo.
Niman on moyolmelajkilis, ajsi hasta ipan on moxtli.
11 Tejua noDios, más tiueyixtikaj ipan on cielo.
¡Moueyilis kitemiltia nochi in tlaltikpaktli!