Niktlalia noyojlo itech Dios niman nikyekteneua itlajtoltsin
56
Xnechikneli noDios,pampa sekimej sa nechtokatinemij nechmiktisnekij,
nochipa nechuijsokij niman nechtlajyouiltiaj.
2 Nochipa nechtokatinemij on notlauelikniuan.
Sanoyej miyekej on yejuan ikan iminueyimatilis nechuijsokij.
3 Ijkuak ninomojtia, motech niktlalia noyojlo.
4 Niktlalia noyojlo motech noDios,
niman nimitskyekteneua ipampa mopromesas.
Niktlalia noyojlo motech noDios niman xninomojtia.
¿Tlinon uelis nechchiuilis sen tlaltikpaktlakatl?
5 Nochipa kipatlaj on tlen nikijtoua
Sa kinemilijtokej nechchiuiliskej tlen xkuajli.
6 Sa nochiuiyan nechpijpixtinemij;
kinekij kimatiskej kanika niau para ompa nechmiktiskej.
7 NoDios, xkincastigaro ipampa on inxompayejyeualis;
xkintlajyouilti ikan motlauel on xkuajkualtin tlakamej.
8 Tejua tikmati kech ika yonitlajyouij;
tikmati keskipa yonichokak.
¿Tlen xtikijkuilojtiu ipan moamamox?
9 On notlauelikniuan chojcholojteuaskej
ijkuak nejua nimitstlajtlanilis xnechpaleui.
Nejua nikmati ika Dios nouan nemi.
10 Niktlalia noyojlo itech Dios
niman nimismauistilia ipampa mopromesas.
Melauak, niktlalia noyojlo itech toTEKO
niman nikyekteneua ipromesas.
11 Niktlalia noyojlo itech Dios niman xninomojtia.
¿Tlinon uelis nechchiuilis sen tlaltikpaktlakatl?
12 On tlen onimitsprometerouilij noDios,
nicumpliros ikan yekteneualistli motechika,
13 pampa otinechmakixtij de on mikilistli,
niman pampa otinechmanauij para maka niuetsis.
Ijkon, nejua nochipa ninemis ipan on tlauijli
kampa onkaj nemilistli,
kampa tinemi tejua noDios.