Ueyikatsajtsilistli de se yejuan kichtakauiyaj
55
NoDios, xkaki noueyikatsajtsilis;maka xmoneneki tinechkakis.
2-3 Xnechkaki niman xnechnankili;
motech ninoueyikatsajtsilia.
Nejua sanoyej ninomojtia
pampa on xompayejyeuamej nechtsajtsiliaj,
niman on notlauelikniuan kijtouaj nechmiktiskej.
Sanoyej nechtlajyouiltiaj, niman nechtlaueltokatinemij.
4 Sanoyej niyoltejtekuini
pampa nikmakajsi nimikis.
5 Ueyi nemojtijli onkaj nopan;
!hasta nikuekuetlaka ika ninomojtia!
6 Niman nikijtoua:
"Sanoyej kuajli yeskia tla nikimpiyaskia nomastlakapaluan
ken sen paloma,
para nipatlaniskia
niman nikontejtemoskia kanon ninoseuis.
7 Sanoyej uejka niaskia,
niman nonchantiskia ipan on xalpatlajkan.
8 Nimantsin niktejtemoskia kanon ninomanauis
de on chikauak ajakatl niman de on ajakakiautli."
9 Tejua noTEKO xtelti tlen kichiuaj on notlauelikniuan.
Xchiua para makasa ma notenkakikan,
pampa nikita ika sa ika nemij nouijsokij
niman nokualaniaj ipan in ueyikalpan.
10 Ipan tonajli niman ipan yeuajli kiyeualojtinemij on ueyikalpan
para kichiuaj xompayejyejualistli niman tlen xkuajli.
11 Ipan on kalpanojtli, tentikaj ikan tlachtekilistli
niman tlakajkayaualistli.
12 Tla yakaj notlauelikniu nechtlauelitaskia, nikxikoskia.
Niman tla yakaj nechuijuikaltiskia, ueliskia niktlanekuiluiyaskia.
13 Pero on yejuan onechchiuilij tlen xkuajli,
yej sano tejua yejuan tinotlajsojkaikniu,
yejuan sanoyej iuan ninonekiya,
14 yejuan iuan ninosentlaliaya ipan itiopan Dios
para san sekan titlajtlajtouayaj,
yejuan iuan ninejnemiya intsajlan on tojlamej.
15 ¡Ma uajla mikilistli imimpan on notlauelikniuan
ijkuak xkimatstokej!
¡Ma xinitij sanken yoltokej ipan intlalkon,
pampa ipan inyojlo onkaj xompayejyeualistli!
16 Pero nejua ninoueyikatsajtsilis itech Dios,
noTEKO nechmanauis.
17 Niknotsas Dios ijkuak kualkan, tiotlak niman tlayoua,
niman yejua nechkakis.
18 Yejua nechmanauis ipan on nouijsokilistli;
nechmanauilis nonemilis maski miyekej nechuijsokiskej.
19 Dios, yejuan Rey para nochipa,
nechkakis, niman kintlajyouiltis on notlauelikniuan,
pampa yejuamej xnokuektlaliaj ken nouikaj,
nion xkimakajsij Dios.
20 Yejuamej, yej kinuijsokij intlajsojkaikniuan;
xcumplirouaj on promesa yejuan iminuan kichiuaj.
21 Intlajtol más yemanki
xken on tsakuanki mantequilla,
pero ipan iminyojlo san kinemilijtokej teuijsokiskej.
Intlajtol más yemanki xken on aceite,
pero on tlajtoltin, ken itlaj espadas yejuan sanoyej tlatekij.
22 Xkauili toTEKO nochi tlen mitsajmana,
niman yejua mitspaleuis.
Yejua, xkaman kauilis ma uetsi yejuan kitlakamati.
23 NoDios, on yejuan temiktiaj niman tlakajkayauaj,
nion tlajkotipan xajsis iminnemilis.
Tejua tikchiuas para ma xinitij ipan on uejkatlan tlalkontli.
Pero nejua, motech niktlalia noyojlo.