Xtlali nochi moyojlo itech toTEKO
31
NoTEKO, motech tejua niktlalia nochi noyojlo para nomanauilis;
¡maka kaman tinechkauilis ma ninopinajti!
¡Xnechmanaui, pampa tejua tiyolmelajki!
2 Xkaki tlinon nimitsijlia noTEKO;
¡nimantsin xnechmanaui!
Xnechiyana, ken sen ueyi tetl
yejuan ueli itech ninomanauiya;
¡xnechmanaui, ken sen ueyi tepanchinantli
yejuan ika nomanauilo!
3 ¡Tejua tej, ken tión ueyi tetl
niman on ueyi tepanchinantli
yejuan uelis itech ninomanauis!
¡Xnechyekana niman xnechmanaui
para ma mitstlakaitakan!
4 ¡Xkinmejkuani on yejuan kinekij nechchiuiliskej tlen xkuajli,
pampa tejua noTEKO, tejua tinechmanauiya!
5 Nimitsmaktilia nonemilis;
xnechmanaui, pampa tejua noTEKO;
tiDios yejuan nochipa tikchiua on tlen tikprometeroua.
6 Nejua sanoyej nechkualaniaj
on yejuan kinmauistiliaj ídolos,
pampa on ídolos xitlaj ueli kichiuaj.
Pero nejua noTEKO, tejua motech niktlalia noyojlo.
7 Motetlajsojtlalis yejuan xkaman tlamis nechmaka pakilistli.
Tejua tikita ijkuak ninajmana,
niman tikmati ijkuak niyolpajsoliui.
8 Xotinechtemaktilij intech on yejuan nechtlauelitaj,
¡yej otinechmanauij intech!
9 Xnechikneli noTEKO,
pampa sanoyej nitlajyouiya.
Hasta xok nikojtik ipan nochi notlalnakayo,
niman xok nitlacha pampa sanoyej nixayokisa.
10 ¡On tlajyouilistli niman on ajmantli
yejuan yonikpix ipan nochi nonemilis,
yejua ye nechmiktijtokej!
Ipampa on ajmantli, xok nikojtik;
¡nochi notlalnakayo xok kojtik!
11 On yejuan nechtlauelitaj noka uetskaj,
niman on nonisiuchanejkauan nechpijpinauiyaj.
Yejuan noteixmatkauan nechmakajsij,
niman ontlatlaksaj ijkuak nechitaj.
12 Nochimej yonechelkajkej,
ken yakaj yejuan yomik.
Ninomati ken sen kaxtli yejuan yotlajtlapan.
13 Nikaki ken miyekej nechichtakatejteneuaj,
niman nejua sanoyej ninomojtia.
Yejuamej san sekan nechtlajtouiliaj para nechmiktiskej.
14 Pero nejua noTEKO, motech niktlalia noyojlo.
Nikijtoua ika tejua tinoTEKO.
15 Nonemilis momak onkaj;
¡xnechmanaui de on yejuan nechtlauelitaj
niman nechtlaueltotokaj!
16 Xnechikneli, nejua yejuan nimotekitkau,
niman xnechmanaui ipampa motetlajsojtlalis yejuan xkaman tlamis.
17 Motech ninoueyikatsajtsilia noTEKO.
¡Xnechpaleui maka ninopinajtis!
¡Yej ma nopinajtikan on xompayejyeuamej!
!Xkintitlani miktlan kampa xokuitlaj kijtoskej!
18 Xkinkamatsakua on yejuan istlakatij,
yejuan tepijpinauiyaj,
yejuan tetlauelitaj,
niman yejuan kinchichiitaj on yejuan yolmelajkej.
19 ¡Tejua noTEKO, sanoyej kuajli moyojlo tikpiya
iminuan on yejuan mitstlakaitaj!
Niman nochi tlakatl kita ken tikintiochiua
on yejuan motech kitlaliaj inyojlo.
20 Tejua tikinmanauiya pampa iminuan tinemi;
tikinmanauiya de on tlen kinchiuilisnekij on xompayejyeuamej.
Motech tejua kuajli nemij;
xok kaktokej tlamach kinteneuiliaj.
21 Ma tikyekteneuakan toTEKO,
pampa onechititij iueyitetlajsojtlalis
ijkuak sanoyej nitlajyouiyaya.
22 Ijkuak sanoyej nitlajyouiyaya,
oniknemilij kas yotinechtlalkauij,
pero ijkuak oninoueyikatsajtsilij motech,
tejua otinechkak niman otinechpaleuij.
23 Xtlajsojtlakan toTEKO, nochimej yejuan nenkineltokaj.
ToTEKO kincuidaroua yejuan xkaman kitlalkauiyaj,
pero on yejuan noueyimatij kincastigaros ken kitocaroua.
24 Nochimej nemejuamej yejuan nenkitlaliaj nemoyojlo itech toTEKO,
¡xmoyoleuakan niman xmoyolchikauakan!