Yekteneualistli para kimakaj tlaxtlauijli toTEKO
30
NoTEKO, nejua nimitsyekteneuapampa tejua otinechmanauij,
niman xotikinkauilij ma noka uetskakan
on yejuan nechtlauelitaj.
2 NoTEKO Dios,
oninoueyikatsajtsilij motech,
niman tejua otinechpajtij.
3 Tejua noTEKO, otinechmakixtij para xoniaj ipan notlalkon;
otinechmakak nemilistli, niman otinechmanauij para xonimik.
4 Nemejuamej yejuan nenkineltokaj toTEKO
¡xmokuikatikan para xyekteneuakan!
¡Xyekteneuakan iyektokatsin,
5 pampa yejua san panotikisa ika kualani,
pero iteiknelilis xkaman tlami!
Maski kamanian tichokaj ijkuak tlayoua,
ijkuak uajtlanesi tipakij.
6 Nejua nikmatiya sanoyej kuajli ninemi, hasta nikijtouaya:
"Nejua xkaman itlaj nechajmanas."
7 Ijkon nikijtouaya,
pampa tejua noTEKO sanoyej tinechtiochiuaya.
Pero san achijtsin otinechtlalkauij,
nimantsin opeu sanoyej ninomojtia,
niman xok nikmatiya tlinon nikchiuas.
8 Motech ninoueyikatsajtsilia noTEKO,
nimitsiknotlajtlanilia xnechkaki.
9 ¿Tlinon tiktlanis tla nimikis niman nechontôkaskej?
¡Tla yoninochiu tlajli, xok uelis nimitsmauistilis,
nion uelis nikteijlis ika tejua nochipa tikchiua tlen tikprometeroua!
10 Xnechkaki noTEKO niman xnechikneli.
¡Tejua xnechpaleui noTEKO!"
11 Yotikpatlak noajmanalis ikan miyek paktli,
nochokilis yotinechejkuanilij,
niman aman, ueyipaktli nopan onkaj.
12 Yejua ika tej, noTEKO Dios,
xuelis ninokamatsakuas:
¡ninokuikatis para nimitsyekteneuas,
niman nochipa nimitsmakas tlaxtlauijli*!