Itlajtol toTEKO kipiya ueyi poder
29
Nemejuamej ángeles, xyekteneuakan toTEKO.Xyekteneuakan toTEKO pampa yejua ueyixtikaj
niman nochi ueli kichiua.
2 Xmakakan ueyilistli itokatsin toTEKO.
Xmauistilikan toTEKO ipan ikualtsin yektiopan.
3 Itlajtol toTEKO kakisti ipan on mar;
on ueyixtikaj Dios kichiua ma tlakomoni,
niman on mar kuajnankilia itlajtol toTEKO.
4 Itlajtol toTEKO, sanoyej chikauak kakisti;
itlajtol toTEKO, temojtij ken chikauak kakisti
ijkuak tlakomoni ipan sen temojti ajakakiautli.
5 Itlajtol toTEKO, kinmatetsayana on cedrojkojtin.
¡ToTEKO kinmatetsayana on uejueyi cedrojkojtin
de ne Líbano!
6 Itlajtol toTEKO kintsikuinaltia on tepemej
Líbano niman Sirión.
¡Kintsikuinaltia ken itlaj toros noso ken itlaj becerros!
7 Itlajtol toTEKO ken itlaj tlapetlanajli.
8 Itlajtol toTEKO kichiua ma tlalolini
ipan on xalpatlajkan;
toTEKO kichiua ma tlalolini
ipan on xalpatlajkan itoka Cades.
9 Itlajtol toTEKO kinmatetsayana on kojtin intoka encinas,
niman ipan on kojyoj, xokuitlaj kojtli nokaua.
Ipan itiopan, nochimej kiueyiteneuaj.
10 ToTEKO yejua kimandaroua on kiautli.
¡ToTEKO yejua Rey
yejuan para nochipa nemi.
11 ToTEKO kinyolchikaua on israelitas itlapejpeniluan,
niman kintiochiua ikan yolseuilistli.