ToTEKO techkaki ijkuak titoueyikatsajtsiliaj itech
28
Motech ninoueyikatsajtsilia noTEKO,pampa tejua tinechmanauiya.
¡Maka xmochiua ken xtinechkaki,
pampa tlamo, ninomatis ken yonimik.
2 Xnechkaki ijkuak nimitstlajtlanilia para tinechpaleuis,
ijkuak nikonmintelketsa nomauan kampaka onkaj moyektiopan.
3 Maka xnechcastigaro iminuan on xompayejyeuamej
nion iminuan on yejuan kichiuaj tlen xkuajli.
Yejuamej nesi ken kuajli tenotsaj,
pero ipan iminyojlo tentikaj ikan nochi tlen xkuajli.
4 Xkincastigaro ken kitocaroua
ipampa on tlen xkuajli kichiuaj.
On tlen xkuajli kitechiuiliaj,
no ijki ma kinchiuilikan yejuamej.
5 !NoTEKO, xchiua para ma uetsikan,
niman maka kaman ma nokuiteuakan!
Ijkon xchiua pampa xkinekij kimatiskej nochi
on uejueyitlajtlamach tlen tejua yotikchiu!
6 ¡Nikyekteneua noTEKO pampa onechkak
ijkuak oninoueyikatsajtsilij itech para ma nechikneli!
7 NoTEKO yejua onechmanauij ken sen escudo.
Itech yejua oniktlalij nochi noyojlo niman onechpaleuij.
Yejua ika niyolpaki
niman ninokuikatia para nikyekteneua.
8 ToTEKO yejua kinmanauiya on israelitas itlapejpeniluan;
yejua kipaleuiya niman kimanuiya on rey yejuan yokitlalij.
9 NoTEKO, xkinmakixti on israelitas motlapejpeniluan,
niman xkintiochiua.
Xkintlajpiya ken sen tlajpixketl kintlajpiya iborregos,
¡niman maka kaman tikinkauas!