ToTEKO yejua noTlauil niman noTemakixtijkau
27
ToTEKO yejua notlauil niman notemakixtilis.¿Akinon tej, nikmakajsis?
ToTEKO yejua kimanauiya nonemilis,
¿Kinon tej, nechmojtis?
2 Ijkuak on xompayejyeuamej yejuan nechtlauelitaj
nosentlaliaj para nechuijsokiskej niman nechmiktiskej,
sanenkaj kichiuasnekiskej,
pampa xueliskej.
3 Maski sanoyej miyekej soldados nechyejyeualoskej,
nejua xninomojtis.
Maski tla yokijtojkej nechuijsokiskej,
nejua noyolika ninemis.
4 San se onkaj tlinon niktlajtlanilia toTEKO.
In yejua nikneki:
ma nichanti mojmostla ichan toTEKO, chika ninemi,
para nikixtlalos ken kualtsin iueyilis toTEKO
niman para ompa nonoueyikatsajtsilis.
5 Ijkuak nopan uajlasnekis tlen xkuajli,
yejua nechmanauis ne kampa chanti;
yejua nechiyanas ipan iyektiopan.
¡Nechtlalis tlakpak ipan sen ueyi tetl para nechmanauis!
6 ToTEKO nechpaleuis
para nikintlanis on yejuan nechtlauelitaj,
niman nejua nikmakas uentli ipan itabernáculo,
niman ninokuikatis ikan miyek paktli
para nikyekteneuas toTEKO.
7 Motech ninoueyikatsajtsilia noTEKO.
¡Xnechkaki!
¡Xnechikneli niman xnechnankili!
8 Noyojlo nechijlia:
"Xtejtemo toTEKO"
niman nejua nimitstejtemoua noTEKO.
9 ¡Maka xmiyana!
¡Maka xnechtlauelchichiua!
¡San tejua uelis tinechpaleuis!
Maka xnechkaua noselti,
pampa tejua tinoDios niman tinoTemakixtijkau.
10 Maski notataj niman nonanaj nechkauaskej noselti,
tejua noTEKO tinechselis niman nopan titlachas.
11 Xnechititi moojui noTEKO;
xnechyekana ipan on kuajli ojtli,
pampa miyekej sanoyej nechtlauelitaj.
12 Maka tinechtekauilis intech yejuamej.
Miyekej nechtlajtolketsteuiliaj niman sanoyej nechtlajtouiliaj.
13 Pero nejua nikmati ika nikitas motetlajsojtlalis
chika ninemi ipan in tlaltikpaktli.
14 ¡Xtlali moyojlo itech toTEKO!
¡Xmoyoleua niman xmoyolchikaua!
¡Kemaj, xtlali moyojlo itech toTEKO!