On chipauak nemilistli
26
Xkijto noTEKO ika xnikpiya tlajtlakojli,pampa nejua kuajli ninouika.
Motech tejua noTEKO, niktlalia nochi noyojlo
niman xkaman niometlamati motech.
2 Kuajli xnechixtlalo ipan nonemilis,
xnechtlamachilisita
niman xkita on tlen nikmati hasta ipan noyojlo.
3 Nejua nikmatstikaj ika tinechtlajsojtla
ikan tetlajsojtlalistli yejuan xkaman tlamis,
niman nejua nochipa nimitsneltoka.
4 Xkaman ninouika iminuan on tlakajkayajkej,
nion ninosentlalia iminuan on omexayakyejkej.
5 Xnikuelita iminuan ninouika on xkuajkualtin.
¡Xkaman iminuan ninopaktia on xompayejyeuamej!
6 Nejua ninomapajpaka para nikteititia ika xnikpiya tlajtlakojli,
niman niau itech on tlaixpan kampa mokoneuan mitsmauistiliaj.
7 Ompa ninokuikatia para nimitsyekteneua,
niman nikteijlia on uejueyi tetlatlachaltin yejuan tikchiua.
8 NoTEKO, nejua niktlajsojtla on ueyitiopan
kampa tichanti,
kampa nonextia moueyilis.
9 Maka tinechkauilis ma nimiki ken mikij on tlajtlakolejkej,
nion maka nontlamis ken ontlamij on temiktianimej,
10 yejuan san ika nemij kichiuaj tlen xkuajli
niman kiminichtakatlaxtlauiliaj
para kitechiuiliaj tlen xkuajli.
11 Pero nejua kuajli ninouika.
¡Xnechikneli niman xnechmanaui!
12 Nejua ninejnemi ipan melajki ojtli,
¡nikyekteneuas noTEKO imixpan itlapejpeniluan!