David kitlajtlanilia Dios para ma kititi katlejua ojtli más kuajli
25
NoTEKO, motech ninoueyikatsajtsilia.2 NoDios, motech niktlalia noyojlo.
Maka xchiua ma ninopinajti.
¡Maka noka uetskaskej notlauelikniuan tla saman onechtlankej!
3 ¡On yejuan kitlaliaj iminyojlo motech maka kaman nopinajtiskej!
¡Yej ma nopinajtikan yejuan xipan mitsitaj!
4 Xnechititi moojui noTEKO,
xnechyekana kampaka tejua tiau.
5 Xnechyekana ipan moojui kampa onkaj on tlen melauak,
niman xnechmachti
pampa tejua tinoDios niman tinoTemakixtijkau.
¡Nochipa motech tejua niktlalia noyojlo!
6 Xkelnamiki noTEKO, on motetlajsojtlalis niman moteiknelilis
yejuan nochipa titechpiyalia,
7 pero maka xkelnamiki notlajtlakoluan
nion on tlen xkuajli onikchiu ijkuak nitelpochtli katka.
Xnechelnamiki noTEKO,
ipampa moueyitetlajsojtlalis yejuan xkaman tlamis,
niman pampa kuajli moyojlo.
8 ToTEKO kuajli iyojlo niman yolmelajki,
yejua kimintitia on tlajtlakolekej on kuajli ojtli
para ipan nouikaskej.
9 Yejua kinyekana ipan inojui on yolyemankej,
niman kintitia ken melajkanemiskej.
10 Yejua nochipa teyekana ikan tetlajsojtlalistli,
nochipa kichiua on tlen kiprometeroua,
niman xkaman kinkaua
yejuan kitlakamatij ipacto niman itlanauatiluan.
11 NoTEKO, maski noxompayejyeualis sanoyej ueyi,
xnechtlapojpolui ken otikprometeroj para tikselis tetlakaitalistli.
12 On yejuan kineki kitlakaitas toTEKO,
toTEKO kipaleuiya para ma kajsi on kuajli ojtli.
13 Yejua, nochipa kuajli nemis ipan inemilis,
niman iuejkakoneuan kiseliskej on tlajli
yejuan Dios okiprometeroj.
14 ToTEKO, nochiua intlajsojkaikniu on yejuan kitlakaitaj,
niman iminuan kichiua pacto.
15 Nejua nochipa niktejtemoua ipaleuilis toTEKO,
pampa yejua nechmanauiya de nochi tlen xkuajli.
16 Xnechita noTEKO niman xnechikneli,
pampa noselti ninemi niman ninajmana.
17 Ipan noyojlo ueyixtiu on yolpajsolouilistli;
xnechkixtili in yolpajsolouilistli.
18 Xkita ken ninajmana niman nitlajyouiya,
niman xnechintlapojpoluili nochi notlajtlakoluan.
19 Xkita ken yomiyekiyakej on yejuan nechtlauelitaj,
niman ken sanoyej kualanij,
hasta kinekiskiaj ma nimiktetsi.
20 ¡Xnechita, xnechmanaui para maka nimikis!
¡Maka tinechtekauilis ma ninopinajti,
pampa motech uelis ninomanauis!
21 Nejua ninomanauis pampa kuajli noyojlo,
xnikpiya tlajtlakojli
niman niktlalia nochi noyojlo motech.
22 ¡NoTEKO Dios,
xkinmanaui on israelitas de nochi ajmantli!