ToTEKO yejua más ueyixtikaj Rey
24
ToTEKO iyaxka nochi in tlaltikpaktli,niman nochi on tlen onkaj,
niman nochi on tlen nemi ipan,
2 pampa yejua okichijchiu ipeuyan in tlaltikpaktli,
niman okitlalij ipan on ueyi mar
niman ipan on uejueyimej ríos.
3 ¿Akinon kauiliskej tlejkos ipan iyektepeu toTEKO?
¿Akinon kauiliskej kalakis ipan iyektiopan?
4 Ompa san uelis kalakis
yejuan kichiua nochi tlen kuajli,
yejuan yolchipauak,
yejuan xkinmauistilia ídolos
niman yejuan xkichiua tlajtolmakalistli para tlakajkayaua.
5 Yejua tej, kiselis itlatiochiualis toTEKO,
niman kiselis tlapojpoluilistli itech Dios yejuan temakixtia.
6 Ijki noneki nemiskej,
on yejuan kitejtemouaj toTEKO,
yejuan kinekij ajsiskej mixpan tejua iDios Jacob.
7 ¡Xtlapouikan tsakuijlomej de Jerusalén!
¡Kuajli xtlapojtiakan tsakuijlomej
yejuan nochipa nenonyaskej,
para kalakis on ueyixtikaj Rey!
8 ¿Akinon on ueyixtikaj Rey?
¡On yejua toTEKO, yejuan sanoyej kojtitikaj
niman xitlaj kimakajsi!
¡On toTEKO, yejuan xkimakajsi nouijsokilistli!
9 ¡Xtlapouikan tsakuijlomej de Jerusalén!
¡Kuajli xtlapojtiakan tsakuijlomej
yejuan nochipa nenonyaskej,
para kalakis on ueyixtikaj Rey!
10 ¿Akinon on ueyixtikaj Rey?
¡On yejua toTEKO, yejuan nochi ueli kichiua!
¡On yejua más ueyixtikaj Rey!