Xtlali moyojlo itech toTEKO
11
Nejua ninomanauiya itech toTEKO.Yejua ika, maka ma nechijlikan:
“Xuiya xmiyanati ipan tepemej ken kichiuaj on totomej.
2 No xkinta ken kichiuaj on xompayejyeuamej.
Yejuamej kuektlaliaj iminarcojtlaminal,
niman kemaj kanaj oniyanaj
kampa kinuajmotlaj on tlakamej yejuan kuajkualtin.
3 Tla in tlaltikpaktli kiyekanaskej on xompayejyeuamej,
¿Tlinon uelis kichiuas sen kuajli tlakatl?"
4 Pero toTEKO nemi ipan on iyektiopan.
ToTEKO nemi ipan itrono nepa iluikak,
niman yejua xkinmixkaua on tlaltikpaktlakamej,
yej sa kinualitstikaj.
5 ToTEKO kinmixtlaxloua on kuajkualtin tlakamej,
niman on xkuajualtin tlakamej.
Pero kintlauelita ika nochi iyojlo on xompayejyeuamej
niman on yejuan kichiuaj on tlen xkuajli.
6 ToTEKO, tlakiauitis ikan tlitl impan on xkuajkualtin tlakamej
ikan tlixochtli, niman azufre.
Niman kuajkis sen ajakatl sanoyej totonki
yejuan nochi kitlatis.
Ijkon ToTEKO kincastigaros ken kitocaroua.
7 ToTEKO yolmelajki niman kitlajsojtla* on melajkachiualistli.
¡Yejua ika, on yejuan yolmelajkatlakamej kitaskej ixayakatsin!