Ueyikatsajtsilistli itech Dios
10
NoTEKO, ¿Man tline san uejka timokaua?¿Tline timiyana ijkuak nikpiya ajmantli?
2 Ikan iueyimatilis sen xompayejyeua tlakatl,
kitlajyouiltia sen tlakatl yejuan yolyemanki,
pero on xompayejyeua sano ipan yejua itlatlalil onuetsis.
3 Sen tlakatl xompayejyeua sa kitenejtikaj on tlinon keleuiya,
niman xkineki kiselis toTEKO,
yej kitlauelita niman kuijuikaltia.
4 Hasta tlakpak onnoyakateketsa niman ijkin kijtoua:
“Xnemi Dios.
Nejua xakaj nechixkomakas tlinon nikchiua.”
On san yejua ijkon kinemilia.
5 Yejua nochipa kuajli kisa on tlen kichiua.
Xueli kajsikamati,
nion xueli kinselia ileyes toTEKO.
Yejua san inka uetska itlauelikniuan.
6 Yejua kinemilia xkaman yakaj kitlanis,
noso xkaman itlaj ika nopajsolos.
7 Yejua xkaman kaua ika tlauijuikaltia,
istlakati niman tetlajtouilia
para itlaj kitechiuilis tlen xkuajli.
Kitoua tlen xkuajli ika itlajtol,
kakisti ika sanoyej kichiuasneki tlen xkuajli.
8 Ipan on kalpanmej kalaki para ompa tepijpiya,
niman ompa kimiktia san akinon maski xitlaj* kichiua.
Sa kitstikaj kanika yau on yejuan xueli nomanauiya.
9 Ken itlaj leon ipan itekal,
kipijpiya san ichtaka
on yejuan xueli nomanauiya.
Sa kicha ijkuak ipan yas para kajsis,
niman ijkuak yokajsik, kitejchiuilana ikan imatlau.
10 Niman on yejuan xueli nomannauiya,
san uajnopachoua niman noteuichoua
ijkuak uetsi ipan imauan on xompayejyeua.
11 On tlakatl xompayejyeua kinemilia ika Dios tlalkaua,
noso nixtlapachoua niman xkama itlaj kita.
12 ¡NoTEKO, xmokuiteua!
¡Xketsteua moma!
¡Maka xkinmelkaua on yejuan tlajyouiyaj!
13 NoDios, ¿Tline san mitsuijuikaltiaj on xkuajkualtin,
niman kinemiliaj xitlaj* ika tikinyolkuitis?
14 Pero sano tejua yotikitak on xkuajli nochiua
niman on tetlajyouiltijli,
niman nochipa tinemi listo para titepaleuiya.
On yejuan xueli nomanauiyaj motech kitlalia inyojlo.
Tejua nochipa tikimpaleui on iknomej.
15 ¡Tejua, xkinkixtili impoder on xompayejyeuamej!
¡Xcastigaro nochi intlajtlakol,
nion se maka ijki tikauas!
16 ToTEKO yejua Rey para nochipa.
¡On yejuan xkineltokaj toTEKO, kinuajkixtis de ipaís.
17 NoTEKO, tejua tikaki iminoración on yejuan yolyemankej.
Tejua tikinyoleua niman tikimpaleuiya.
18 Xpaleui ken kitocaroua on iknotl
niman on yejuan tlajyouiya,
para on tlaltikpatlakatl,
makasa kaman ma temomojti!