Kiueyiteneuaj toTEKO ika yejua kuajli juez
9
Ah, tejua noTEKO,nikneki nimitsueyiteneuas ika nochi noyojlo,
niman nikteijlis ken tlajtlamach yotikchiu
yejuan sanoyej tetlatlachaltij.
2 Ah, tejua Más Ueyixtikaj,
nikneki chikauak nikijtos ikan nochi paktli.
¡Nikneki ninokuikatis kuikamej de ueyiteneualistli itech noDios!
3 Notlauelikniuan mixpan cholojteuaj;
uetsij niman mikij.
4 Tejua tijuez yejuan yolmelajki.
Yotimotlalij ne kampa titlamandaroua
para tikixtlalos tlen onikchiu kuajli noso xkuajli.
5 Tejua yotikinmajuak on yejuan xmitsneltokaj,
niman yotikinxoxotonij on xompayejyeuamej.
¡Yotikimpopoloj para yeyika!
6 Totlauelikniuan yomikkej,
niman no opolijkej inkalpanuan.
Tejua otikinxoxotonij niman xitlaj* onokau
yejuan ika kinmelnamikiskej.
7 Pero toTEKO, yejua yes rey para nochipa,
yejua yokitlalij itrono
para teixtlalos niman teyolkuitis.
8 Kintas on tlaltikpaktlakamej
tla kipiyaj noso xkipiyaj tlajtlakojli.
Nochi tlaktl kitlajtlakolmakas ken kitocaroua.
9 ToTEKO kinmanauiya on yejuan kintlajyouiltiaj.
Yejua kinmanauiya ijkuak kipiyaj tlajyouilistli.
10 NoTEKO, on yejuan mitsixmatij, yokitlalijkej inyojlo motech.
Kimatstokej ika xkaman tikinkaua yejuan mitstejtemouaj.
11 Xkuikatlalikan toTEKO,
itech yejua akin tlamandaroua
ipan on ueyikalpan Jerusalén.
Xteijlikan nochiuiyan on tlen yejua yokichiu.
12 Dios xkinmelkaua on yejuan najmanaj.
Nochipa kelnamiki ken yejuamej chokaj,
niman kincastigaros on yejuan tetlajyouiltiaj.
13 NoTEKO, xnechikneli.
Xkita ken nechtlajyouiltiaj on yejuan nechtlauelitaj.
¡Xnechmanaui para maka nechmiktiskej!
14 Kemaj ne ikalakiyan on ueyikalpan Jerusalén,
nochi tlakatl nikijlis ika tejua mitstocaroua mitsueyiliskej,
niman ika nejua sanoyej nipaki ika otinechmakixtij.
15 On yejuan xmitsneltokaj,
sano yejuamej nokuij ipan on tlatlalijli
yejuan okitlalikej para oksekimej.
Yejuamej nokximamalinaj ika on tlatlalijli
yejuan sano yejuamej okiyankej.
16 ToTEKO yonoteititij, ika yejua sen kuajli juez.
Sen tlakatl xompayejyeua sano yejua onuetsi ipan itlatlalil.
17 On xompayejyeuamej
niman xtlaneltokaj yejuan kelkauaj toDios,
ontlamiskej kampa onkaj mikilistli.
18 Xnochipa tej, kinmelkauaskej on mayankej,
nion xpara nochipa kipoloskej intlamachalis.
19 Xmokuiteua noTEKO,
niman maka xkauili ma mitstlani yakaj tlakatl.
Xkincastigaro ken kitocaroua, on yejuan xmitsneltokaj.
20 Xchiua ma nomojtikan, noTEKO.
¡Xkinmachisti ika yejuamej san tlaltikpaktlakamej!