Iueyilis Dios niman on tlakaitalistli yejuan okiselijkej on tlaltikpaktlakatl
8
ToTEKO, akin titoueyitlanauatijkau, ¡moueyilis yejua más kiteneuaj imanian in tlaltikpaktli!
¡Moueyilis más tlakpak ajsi xken on cielo!
2 Ika iminachtojtlajtol on kokonej
yejuan kemach peuaj tlajtlajtouaj,
niman ika on kuikatl
yejuan kinokuikatiaj on kokonej más uejueyimej,
tikinyakatsakuilia on motlauelikniuan.
¡Niman ika tikinkamatsakua on motlauelikniuan
niman on yejuan kinekij tetlakuepiltiskej!
3 ijkuak najkotlacha niman nikita on cielo
yejuan tejua otikchijchiu,
on metstli niman on sitlalimej
yejuan ompa ne otikintlalij,
4 ijkin ninotlajtoltia:
"¿Man tline tikita ueyixtiokej on tlaltikpaktlakamej,
niman tline nochipa tikinnelnamiki,
niman impampa yejuamej timotenmati?"
5 Tejua otikinkchijchiu on tlaltikpaktlakamej sa kechkich opoliuito
para yeskiaj ken tejua,
niman nochimej otikinmakak ueyilistli
niman tetlakaitalistli.
6 Otikinmaktilij on tekiuajyotl
para tlamandarouaj ipan nochi tlen otikchijchiu.
Otikinmakak tekiuayotl
para kimandarouaj nochi on tlajtlamach*:
7 impan on borregos niman on uakaxtin,
impan on tepeyolkej,
8 impan on totomej
yejuan patlajtinemij,
impan on michimej
yejuan nemij ijtik mar,
niman impan on oksekimej yolkamej
yejuan tlanelouaj ipan on mar.
9 ToTEKO, toueyitlanauatijkau,
¡Motokatsin yejua más kiteneuaj imanian tlaltikpaktli!