ToTEKO yejua juez yejuan yolmelajki
7
NoTEKO Dios, motech ninomanauis.¡Xnechmanaui de nochimej on yejuan nechajsisnekij,
2 pampa yejuamej ken itlaj leones,
yejuan uelis nechkojkokoskej
niman xakaj uelis nechmanauis!
3 NoTEKO Dios,
¿Tlinon xkuajli onikinchiuilij?
¿Tlinon tlajtlakojli nikpiya?
4 ¿Tlin manin itlaj ika oniktlakuepiltij sen notlajsojkaikniu?
¿Manin itlaj onikichtekilij notlauelikniu?
5 Tla ijkon onichiu, notlauelikniu ma nechajsi,
niman ma nechtejchiuilana ipan tlajli,
niman notetlakaitalis ma ipan chojcholo.
6 ¡NoTEKO, xmotelketsa ika motlauel!
¡Xkinmixnamiki ikan miyek motauel on notlauelikiuan!
Tejua tikijtoua tikchiuas justicia.
Tla ijkon, xtlacha niman xchiua tlen kuajli ken kitocaroua.
7 Xkinsentlali moyeualkan on miyekej naciones,
miman desde ne tlakpak xkinmandaro.
8 NoTEKO, tejua tikinyolkuitia
niman tikincastigaroua nochimej on naciones
tla kichiuaj tlen xkuajli.
Tejua xnechyolkuiti
niman xtenkixti ika xnikpiya tlajtlakojli,
pampa xnitlajtlakolejketl.
9 NoTEKO, tejua akin tiyolmelajki,
tejua ueli tikyolita
niman tikmati tlinon kinemilia sen tlakatl.
Xchiua para ma poliui on tlen sanoyej xkuajli kichiuaj on xompayejyeuamej,
pero xpaleui on tlakatl yejuan yolmelajki.
10 On Dios Más Ueyixtikaj nechmanauiya;
yejua kinmakixtia on yejuan san se inyojlo kipiyaj itechika.
11 Dios yejua sen teyolkuitijketl yejuan yolmelajki,
niman nochipa kintlajtlakolmaka on xompayejyeuamej.
12 Tla sen tlakatl xkineki noyolpatlas
niman nokuepas itechika Dios,
yejua ye kipiya tlinon ika castigaros.
Ye kipiya iespada niman iarco yokitijtilinij.
13 Sa poliui kinmotlas ika incastigo ken itlaj tlaminajli
yejuan tlikuitiu yejuan ika kinmiktis.
14 Iminyojlo on xompayejyeuamej tentikaj
ika on tlen xkuajli kinekij kichiuaskej.
Yejuamej kinchiuaj tlen xkuajli
niman sanoyej istlakatij.
15 Yejuamej kichkuaj sen pozo uejkatlan
para kintlatlaliliaj oksekimej,
pero yej sano yejuamej ompa onxiniskej.
16 ¡On tlen xkuajli kichiuaj
niman inxompayejyeualis,
sano yejuamej impan uetsis!
17 Nikueyilis noueyiTEKO,
pampa yejua yolmelajki.
Ninokuikatis kuikamej itech on Dios Más Ueyixtikaj.