Xnotsa Dios ijkuak kualkan
5
NoTEKO, xkaki tlinon nimitsijlia.Xkaki ken ninejeltia niman ken nitetena.
2 NoRey niman noDios,
xkaki ken nimitsyemankatlajtlanilia ikan nooración
para tinechpaleuis,
pampa san tejua motech nikuiteua no oración.
3 Ijkuak kualkan tikaki ken nimitsnotsa.
Uelipan nimitsijlia tlinon nikneki,
niman kemaj nikcha on tlinon ika tinechnankilis.
4 NoDios, tejua xtikeulita on tlen xkuajli.
Yejua ika, on xompayejyeuamej xuelis nemiskej motech.
5 Nion tejua motech, xuelis nemiskej yejuan noueyimatij.
Tejua sanoyej tikintlauelita nochimej on xkuajkualtin tlakamej.
6 Tejua tikimpopoloua on yejuan istlakati,
niman xtikinselia on yejuan tlakajkayauaj niman temiktiaj.
7 Pero nejua ika moueyitetlajsojtlalis*
uej niueli nikalaki ipan moyektiopan;
niueli nimitsmauistilia ikan nochi notlakaitalis
chika neka nontlacha kampaka onkaj moyektiopan.
8 NoTEKO, xnechpaleui ma ninouika melajki.
Xnechuika kampaka kuajli ojtli,
ma nikpiya chipauak nemilistli,
para maka nechtlaniskej on notlauelikniuan.
9 Yejuanmej xkaman kijtouaj on tlen melauak.
¡Ipan inyojlo tentikaj ika on tlen xchipauak!
Inkamak ken itlaj tlalkontli
yejuan molonki
yejuan xtsakutikaj.
¡Iminnenepil san ueli kijtoua tlakajkayaualistli!
10 ¡NoTEKO, xkintlajtlakolmaka niman xkincastigaro!
Xchiua para maka uelis kichiuaskej on tlen xkuajli kinemiliaj!
Xkinkaua pampa sanoyej yotlajtlakojkej,
niman xipan mitsitaj.
11 Pero ma pakikan on yejuan kitlaliaj inyojlo motech.
Ma nokuikatikan ikan paktli nochipa
pampa tikimanauiya.
On yejuan mitstlajsotlaj* melauak pakij san mopampa.
12 Tejua tej, noTEKO, tiktiochiua yejuan nochipa mitsneltoka.
Tikamnauiya ikan moescudo*
pampa tiktlajsojtla*.