41
"¿Tiuelis tikajsis on yolki Leviatán ken tikajsiskia sen michin ika sen mekatsintli yejuan kipiya sen teposchijkoltsintli ikuapan? ¿Tiuelis tiknenepilsalos ika sen tomauak mekatl? 2 ¿Tiuelis tikyakakoyonis niman tikalaktilis sen tomauak mekatl? ¿Noso tiuelis tikamachalkoyonis ika sen teposchijkojli? 3 ¿Noso manin mitsiknotlajtlanilis para xkikneli, niman mitsyemankatlajtlanilis para xmakaua? 4 ¿Manin uelis tikchiualtis ma mitsprometerouili para moesclavo yes ipan nochi inemilis? 5 ¿Tiuelis tikmauiltis ken itlaj tototsintli yeskia? ¿Tiuelis tiksalos ken itlaj ajauijli para kinauiltiskej mochpotsitsiuan? 6 ¿Tiuelis tikuikas kampa tlanamakalo para ompa tiknamakas? ¿Uelis kitetekiskej para kinamakaskej? 7 ¿Tiuelis tikoyonis ikuetlaxyo* ikan tlaminaltin? ¿Noso tiuelis tikoyonis itsontekon ikan varas yejuan kuayakapitstikej? 8 Tla san tikmatokas, mopan uajnokuepas, niman xokaman tiknekis tikmatokas pampa xkaman tikelkauas ika omitsuijsok.9 "San akinon, san ika kitas on Leviatán sotlauis pampa sanoyej kimakasis. 10 Tla yakaj itla kichiuilia, yejua nimantsin sanoyej kualani niman xakaj ueli kixnamiki. 11 ¿Akinon uelis kixnamikis niman xitlaj* ipan nochiuas? ¡Xakaj ipan in tlaltikpaktli uelis kixnamikis!
12 "No nikinteneuas ikxiuan, niman no nikijtos ken temojtij kojtik. 13 ¿Akinon uelis kixtilis ikuetlaxyo* yejuan kitlapachotikaj ipan itlakayo? ¿Noso akinon uelis koyonis on tlanepantli itlakapankakauayo yejuan ika nomanauiya? 14 ¿Akinon uelis kitlapouilis itenxomaj kampa tekpantokej itlauan yejuan sanoyej tlatekej? 15 Ipan itlakayo kuajli tetekpantokej on ken escudos* yejuan ika nomanauiya, niman yejuan sanoyej chikajkej ken tetl. 16 Sanoyej kuajli najnamiktokej; nion ajakatl xueli kalaki ijtik. 17 Sanoyej kuajli najnamiktokej niman kuajli sasalijtokej; xakaj uelis kinxexelos. 18 Ijkuak yekxoua, ken tlapetlani; ixtololojuan petlanij chichiltikej kenon tonaltsintli ijkuak tlanesi. 19 Ipan ikamak kisa tlimilinajli, niman ipan on tlimilinajli kisa miyek tlimochitl. 20 Nochi okan iyak kisa poktli; nesi ken itlaj kontli yejuan akuakualaka ipan tlitl. 21 Ikan iijyo kitlikuiltia tlixochtli, ikamak kisa tlimilinajli. 22 Ikechkojyo sanoyej kojtik; yejua ika, nochimej yejuan kinamikij sanoyej kimakajsij. 23 Ipan itlakayo, maski kampa nochi nakatl, sanoyej chikauak ken itlaj tepostli. 24 Iyoltsin ken tetl, sanoyej chikauak, kenon tetl yejuan ika tlakuechouaj. 25 Ijkuak yejua nokuiteua, hasta on yejuan más uejueyi tetlankej nomojtiaj niman ontlatlaksaj. 26 Nion espada, nion lanza, nion flecha, nion estaca, xueli ika kitsopiniaj. 27 Para yejua, on tepostli xkojtik, yej ken itlaj milouatl, niman on bronce, ken kojpalaxtli. 28 Yejua xkincholouilia on tlaminaltin yejuan ika kimojmotlaj. Tla kitemojmotlaj, yejua kimati ken ipan kixiniskiaj polokatl. 29 Tla kimailiaj ika sen mazo, yejua kimati ken kimailiskiaj ika milouatl. San uejuetska ijkuak kaki kakistiliaj on espadas. 30 Ijkuak noteuilana ipan sokitl, hasta kitlapojtiu iojui, ken sen tepostlaxoponajli ijkuak kiteka kuentli. 31 Ijkuak kalaki ipan on uejkatlan mar, hasta kuakualakatiu on atl. Ken ijtik kontli kampa kinelouaj ajuiyalistli. 32 Ijkuak yau ijtik on mar, ikuitlapan hasta nokajtiu, on atl posonki istak niman petlanki. 33 Ipan in tlaltikpaktli, xnemi okse yolki ken yejua, yejuan tlachijchijtli para xkaman nomojtis. 34 Yejua kinmixnamiki yejuan más noueyiteneuaj, niman yejua rey de nochimej on temojmojtijkej yolkej."