Job onoyolkuitij ixpan toTEKO
42
Kemaj Job okinankilij toTEKO, niman ijkin okijlij: 2 "Nejua nikmatstikaj ika tejua nochi tiueli tikchiua, niman xakaj ueli mitskaualtia tikchiuas on tlen tikneki. 3 ¿Akin nejua para niometlamatis de motlamatkilis niman ijkon nikteititis ika xitlaj* nikmati? Nejua nitlajtlajtouaya de on tlajtlamach* tlen xnikajsikamatiya, on tlajtlamach* tetlatlachalistin yejuan xniueliya nikajsikamati.4 "Tejua otinechijlij: 'Xnechkaki, nejua nikneki nimitsnojnotsas; xnechnankili tlen nimitstlajtoltis'.
5 "Achtoj, san nikakiya mitsteneuaj, pero aman, nimitsita ikan nixtololojuan. 6 Yejua ika, aman ninoyolkokoua niman ninotlalia ipan tlalkuechtli niman ipan tlikonextli. Nimitstlajtlanilia, xnechtlapojpolui."
Dios oksejpa kimaka Job on riquezas yejuan okipolojkaj
7 Sakin, ijkuak toTEKO yokijlij Job nochi in tlajtlamach*, no okinots Elifaz niman ijkin okijlij: “Sanoyej nikualantikaj pampa tejua niman on omemej motlajsojkaikniuan xonenkijtojkej tlen melauak de nejua. Pero Job, notekitkau, uej kemaj okijtoj tlen melauak de nejua. 8 Aman tej, xkitatij notekitkau Job, niman xkuikakan chikome uakax niman chikome borrego para nennechmakaskej uentli yejuan nochi tlatla ipampa nenmotlajtlakoluan. Niman Job, notekitkau, kichiuas oración nenmopampa, niman nejua nikselis ioración. Niman ijkon, nejua xnenmechcastigaros maski ijki mechmelauaya pampa xonenkijtojkej tlen melauak de nejua. Job, notekitkau, uej kemaj okijtoj tlen melauak de nejua."
9 Kemaj Elifaz, Bildad niman Zofar oyajkej niman okichijkej on tlen toTEKO okinnauatij, niman toTEKO okiselij ioración Job.
10 Kemaj, ijkuak Job yokichiu oración impampa itlajsojkaikniuan, Dios oksejpa okimakak on riquezas yejuan kipiyaya achtoj. Niman on riquezas okse okpa ichkich okimakak de on yejuan achtoj kipiyaya. 11 Kemaj ikniuan yejuan tlakamej niman yejuan siuamej, niman nochimej yejuan ye kixmatiyaj achtoj, oyajkej ichan Job para okitlajpalotoj, niman ompa iuan otlakuajkej. Yejuamej kiyoltlaliayaj niman kiyolchikauayaj pampa toTEKO okuajtitlanilij miyek tlajtlamach* tlen tekokoj niman teajman. Niman cada se de yejuamej okitlayokolij Job sentl tomin de plataj niman sentetl anillo de oro.
12 Niman Dios sanoyej okitiochiu Job ipan on keski xipan chika nemiya. Más okimakak riquezas xken on yejuan achtoj kipiyaya. Okipix 14 mil borregos, chikuasen mil camellos, se mil yuntas de uakaxtin, niman se mil polokomej*. 13 No ijki, okipix chikomemej ikoneuan yejuan tlakamej niman yeyimej yejuan siuamej. 14 On ichpoch yejuan yakatstiu okitokayotij Jemima, yejuan ika ome okitokayotij Cesia, niman yejuan ika yeyi okitokayotij Keren-hapuc. 15 Ipan nochi in tlaltikpaktli, xnemiyaj ichpokamej más kualtsitsimej ken ichpochuan Job. Niman imintataj okinmakak herencia iminuan inmikniuan yejuan tlakamej.