40
No ijki, toTEKO ijkin okijlij Job: 2 "Tejua yejuan tiknekiya nouan timokamauijsokis nejua yejuan nochi ueli nikchiua, ¿sanken* tikneki tinechtlajtolixnamikis?"Job okinankilij toTEKO
3 Kemaj Job ijkin okinankilij toTEKO: 4 "Xnikmati ken nimitsnankilis, pampa nejua nion achijtsin xnechmelaua* para nimitsnankilis. Más kuajli makasa ma ninauati. 5 Nejua miyekpa yonitlajtoj, niman aman xok nikpiya tlinon nikijtos."
Dios oksejpa okinankilij Job
6 ToTEKO oksejpa okinots Job desde ijktik sen ajkomalakotl, niman ijkin okijlij: 7 "Aman, ma nikita tla melauak titlamachilischikauak, niman xnechnankili tlen nimitstlajtoltis. 8 ¿Tikijtosneki ika nikchiua on tlen xmelajki? ¿Noso tikneki tikijtos ika nejua nikpiya tlajtlakojli para ijkon nesis ika tejua xtikpiya tlajtlakojli? 9 ¿Tikuitia no ijki tikpiya poder ken nejua? ¿Ijkuak titlajtoua, no tlakomoni ken ijkuak nejua nitlajtoua? 10 Tla ijkon, xmotlakenti ikan ueyilistli niman ikan tlakaitalistli; sanoyej kualtetsin xmotlakenti para ma nesi ika sanoyej tiueyixtikaj. 11 On yejuan nouejueyimatij, imintech xmotlauelkixti niman xkintlajyouilti. 12 Xkinmixkechi niman xkinmixtlani, xkintlani on yejuan xompayejyeuamej san kanon kampa nemiskej. 13 Xkintôka nochimej ipan tlajli, niman xkintsakua kampa tsakutokej on mikatsitsimej. 14 Kemaj sano nejua nikijtos ika melauak tikpiya poder yejuan ika otitetlan.
15 "Xkixtlalo on temojtij yolki Behemot. On yolki nejua onikchijchiu, no ken tejua onimitschijchiu. Niman yejua kikua sakatl no kenon uakaxtin. 16 Xkita ken tlakayokojtik. Xkita ken metskojyonakayoj niman metskojyokojtik. 17 Ikuitlapil kimelaua ken itlaj kojtli de cedro. Ikxitlaluayouan, sanoyej kuajli majkuixtokej. 18 Iomiyouan sanoyej chikajkej ken itlaj tubos de bronce, ikxiuan no sanoyej kojtikej kenon tepostli de hierro. 19 On yolki Behemot yejua más kuajli noueyitlachijchiual, niman san nejua uelis nikmiktis. 20 Yejua kikua on sakatl yejuan onkaj ipan tepetl kampa nauiltiaj on yolkej tekuanimej. 21 On yolki Behemot noteka niman niyana itsajlan on asakayoj yejuan noskaltia itenko on kampa atitlan niman tlasokitoka. 22 On tlakomej intoka Lotos mayeualtikej, kimakaj tlajseuajlotl, niman on kojtin* auexomej yejuan noskaltiaj itech on ayajtok, uej kiyeualojtokej para kiyanaj. 23 Ijkuak on río Jordán sanoyej notlaloua, yejua xnomojtia, maski on atl ajsi hasta itech itenxomaj, yejua iyolika nemi. 24 ¿Akinon uelis kixtilis ixtololojuan niman kajsis, noso akinon uelis kiyakakoyonis para kalaktilis sen mekatl?