39
"¿Tikmati kamanon tlanemitiaj on tepechivas? ¿Kamanian otikitak ken tlanemitiaj on siuamasamej? 2 ¿Tikmati keski mestli kuika para noskaltiaj inkoneu inmijtik, niman kamanon tlanemitiaj? 3 Ijkuak tlanemitiaj, notepotsouaj, niman san panoua ika nokokouaj. 4 Kemaj on inkoneuan noskaltijtiuij ne ipan campo, niman más sakin* yauij; kajteuaj iminnan para yeyika niman xok nokuepaj.5 "¿Akinon okichiu para ma makajtinemi on tepepoloko? ¿Akinon okimakau para ma kistinemi? 6 Nejua onikau ipan on xalpatlajkan niman ipan on ixtlauatl kampa onka istatl, para ompa ma chanti. 7 Yejua iyolika para ompa nemi kampa xitlaj* kinakaskokoua ken tla nemiskia ipan on ueyikalpan, nion xkipiya iteko yejuan kitsajtsilijtikaj. 8 Kistinemi ipan on tepetsitsimej para kitejtemoua sakatl, niman kitejtemoua san katlejua xojtli para tlakua.
9 "¿Tiknemilia ika on búfalo kinokauilis tiktekitiltis, niman ijkuak tlayoua kinekis nokauas kampa tikimpiya mouakaxuan? Melauak ika ka. 10 ¿Tiuelis tikyokojtis niman tikchiualtis ma tlaxoponi, noso tlakuentekis ipan motlal? 11 ¿Tiuelis itech tiktlalis nochi moyojlo pampa sanoyej kojtik, niman uelis tikauilis ma kichiua nochi mochikajkatekiu? 12 ¿Tiknemilia uelis tiknauatis ma mitssentlalili motrigo niman mitsiktilis kampa tikteinia?
13 "Xkita on ueyi tototl avestruz. Yejua nopapatlatsa ikan paktli, pero xueli patlani kenon cigüeña. 14 Niman tlatlajkali ipan xajli, niman kemaj kinkajteua iteuan para on tonaltsintli ma kinxotlalti. 15 Xkinemilia ika yakaj uelis kimpaxos, noso itlaj yolki uelis kinchojcholos. 16 IKoneuan xkintlajsojtla* ken xikoneuan yeskiaj, niman xitekiu tla mikiskej. 17 Ijki kichiua, pampa nejua xonikmakak tlamatkilistli nion tlamachilistli. 18 Pero ijkuak nokuiteua niman ontlaksa, kintlajtlani on caballos niman on yejuan yetiuij.
19 "¿Tejua otikmakak ifuerza on caballo? ¿Tejua otiktlalilij on ikechpantsojmiyo yejuan kualnextia? 20 ¿Tejua tikchiua para ueli ma tsikuini ken itlaj chapolin? ¿Niman tejua tikchiua para ma temomojti ijkuak chikauak tlajtsomiya? 21 Yejua hasta tlaluauana ika istiuan pampa noueyimati ika sanoyej kojtik. Ipan guerra xnomojtia yas. 22 Niman yejua xitlaj* kimakajsi. Xitlaj kimojtia, nion on espada xkimakajsi. 23 Maski kakalaka on caja kampa kiktij on tlaminaltin, niman ikan tonaltsintli hasta pepetlaka on espada niman on espada pitentsin, on tlakatl yejuan yetiu, xnomojtia. 24 Sa kinektikaj notlalos ijkuak kaki kipitsaj on trompeta, niman xok yakaj ueli kiteltia. 25 Ijkuak kaki kipitsaj on trompeta, on caballo tsajsi para kinankilia. Desde uejka kijnekui on guerra, niman kaki on tlanauatijli para ma teixnamiki.
26 "¿Tiknemilia tiueli tikititia on tototl halcón ken patlanis pampa sanoyej titlamatki, niman ika tiueli tikijlia ma uiya kampaka sur? 27 ¿Tejua tiknauatia on kuaktli para ma kitlali itepasol kampa tlakpak? 28 Ipan tonajli niman ipan yeuajli, yejua nochipa kuajli chanti ipan teostomej, niman itepajsol kitlalia ikuatipan on uejueyitemej yejuan yakapistikej. 29 Desde tlakpak, uejka ontlachixtikaj para kita tla nemi sen yolki yejuan kajsis para kikuas. 30 Kampa miki sen yolki nimantsin ompa yau; ompa kinextia yestli yejuan konij ikoneuan."