Dios okinankilij Job
38
Kemaj toTEKO okinots Job desde ijtik sen ajkomalakotl niman ijkin okijlij: 2 "¿Akin tejua ika tiometlamati de notlamatkilis, tejua yejuan xkipiya tlamatikilisltli? 3 Aman ma nikita tla melauak titlamachilischikauak; niman xnechnankili tlinon nimitstlajtoltis.4 "¿Kanon tinemiya ijkuak onikchijchiu in tlaltikpaktli? ¡Xnechijli tla melauak sanoyej titlamachilisyej! 5 ¿Tikmatstikaj akinon okitlalij kech tlatemachijtli yes, niman tikmatstikaj akinon okitejtemachiu ikan mekatl? 6 ¿Tikmatstikaj tlinon ipan ijkak ipeuyan? ¿Tikmatstikaj akinon okitlalilij on ueyitetl yejuan iesquinero, 7 chika nokuikatiayaj on sitlalimej yejuan kisaj ijkuak uejkakualkan, niman on ángeles sanoyej tsajtsiyaj ikan paktli?
8 "Ijkuak on mar okuepon ijktik on tlajli, ¿akinon okitlalilij kampa tlantias para xnochayauas nouiyan? 9 Nejua oniktlakentij on mar ika on moxtli niman oniktlapachoj ika on ayautli. 10 Oniktlalilij kampa tlantias on mar, niman kuajli onitlatsaku kampa onoteltia. 11 Niman onikijlij: “Hasta nikan tejkos, maka tias más neka; nikan uajtlamis mouejueyi akoxnalis”
12 "¿Kamantika ipan monemilis otiknauatij on tlanexyotl para ma tlanesi? 13 ¿Niman kamantika otiknauatij on tonaltsintli para ma tlauilo ipan nochi in tlaltikpaktli para on xkuajkualtin tlakamej ma niyanakan? 14 Ijkuak on tonaltsintli ye uajkistiu, tlauiloua ipan in tlaltikpaktli, kemaj kichiua para on tepemej niman ixtlauamej ma nesikan ken telaj yejuan tlapajloj. 15 Niman on xkuajkualtin tlakamej kinkuiliaj on tlauijli; yejua ika xok kichiuaj tlen xkuajli.
16 "¿Kamantika yotitemotoya hasta kampa ontlantikaj on mar? ¿Niman yotikitak kampa on atl meya? 17 ¿Yotikintaka kanon ajsij on mikatsitsimej? ¿Yotikitaka tlakennemejkan ne miktlan kampa tlayouatok? 18 ¿Tikmati kech ika patlauak in tlaltikpaktli? ¡Xnechijli tla melauak nochi in tikmati!
19 "¿Tikixmati on ojtli yejuan ajsi kampa onkaj on tlauijli niman kampa onkaj on tlayouajlotl? 20 ¿Tiuelis tikinuikas kampa on tekitisej, niman oksejpa tikinuikas kampa chantij? 21 Melauak ika ka. Tejua xtikmati, pampa nochi on ye onkatka ijkuak tejua xe titlakatiya.
22 "¿Yotiajka ne kampa nitlayejyeua; kampa nikeua on nieve niman on tesiutli? 23 Nejua nikinmejeua para nikintitlanis ijkuak onyas tlajyouilistli, ijkuak nouijsokilos, niman ijkuak onyas guerra. 24 ¿Tikmati kanon ualeua niman hasta kanon nochayaua on tlauijli noso kanon ualeua on ajakatl yejuan ualeua neka ikisayan tonaltsintli niman yau ipan nochi in tlaltikpaktli? 25 ¿Tikmati akinon kuajmakaua on atl ijkuak sanoyej chikauak kiaui, niman akinon kuajmakaua on tlapetlanalistli niman on tlakomonajli, 26 para ma kiaui ipan on xalpatlajkan kampa xakaj chanti? 27 Ika on atl, patsiui on tlajli uaki, niman itsmolini xojtli.
28 "¿Tikmati akinon itataj on kiautli niman itataj on ajuichtli? 29 ¿Tikmati akinon inanaj on hielo, niman inanaj on hielojkuechtli? 30 ¿Tikmati akinon kichikaua ken tetl on atl, niman akinon kichiua para ma nochiua hielo ixko on uejkatlan mar?
31 "¿Tejua tikchiua para san sekan ma onyakan on sitlalimej intoka Pléyades? ¿Noso uelis tikinchajchayauas on sitlalimej yejuan kixneskayotiaj Orión? 32 ¿Tejua tiueli tikchiua para ma kisa ipan ihora on sitlalin yejuan uajkisa uejkakualkan? ¿Tejua tiueli tikinyekana on sitlalimej yejuan kixneskayotiaj on Osa Mayor niman on Osa Menor? 33 ¿Tikixmati on tlanauatiltin yejuan kinmandaroua on sitlalimej, metstli niman on tonaltsintli? ¿Uelis tikintekitiltis on tlanauatiltin para tikmandaros on tlajtlamach ipan in tlaltikpaktli?
34 "¿Uelis tiknauatis on moxtli para ma kiaui sanoyej chikauak? 35 ¿Tla tiknauatia on tlapetlanajli para ma tlapetlani, yejua mitsijlia: "Nikan ninemi para nikchiuas on tlen tikneki"? 36 ¿Akinon okinmakak tlamachilistli on tototl ibis niman on piyon kaxtil? 37 ¿Akinon sanoyej tlamatki* niman kimati keski moxtli onkaj? ¿Akinon uelis kixtis atl ipan on moxtli niman kichiuas para ma kiaui, 38 para on tlalkuechtli ma nochiua sokitl, niman para ma nochiuakan on tlaltsomtemej?
39 "¿Tejua tikajsi sen yolki para tikualtia on leona iuan ikoneuan niman tikinkualtia hasta kaman ixuij? 40 ¿Tejua tiktejtemoua imintlakual ijkuak yejuamej niyanaj ijtik on teostomej kampa iminchan noso ijkuak kipijpiyaj sen yolki ijtik on tlakoyoj? 41 ¿Akinon kinmaka tlakuajli on kakalomej ijkuak inkoneuan sanoyej apismikij niman kitejtemouaj tlen kikuaskej niman nechtlajtlaniliaj ma nikintlakualti?