37
"Ijkuak nikita on ajakakiautli, sanoyej niyoltejtekuini, hasta ken toponiskej noyelpan. 2 Xkakikan on chikauak tlakomonajli ijkuak Dios tlajtoua, on tlakomonajli yejuan kisa ikamak Dios. 3 Yejua kichiua ma tlapetlani ipan nochi on cielo, niman nochiuiyan tlajtlaluis ipan in tlaltikpaktli. 4 Kemaj, kakisti on chikauak tlakomonajli ijkuak Dios tlajtoua ikan ueyilistli. Niman chika tlakomoni, sanoyej tlapetlani. 5 Ijkuak Dios tlakomonia ikan itlajtol, nochiua tlajtlamach* tetlatlachaltij yejuan tejuamej xtikajsikamatij. 6 Dios yejua kinauatia on nieve para ma tlasekuuetsi ipan in tlajli, niman yejua kichiua para ma tlapayaui, noso para ma kiaui chikauak. 7 Niman ijkon, kichiua para nochimej ontlatlaksaj iminchan para onniyanaj, niman ijkuakon, nochimej kimatij ika Dios nochi yejua kichiua ikan iueyi poder. 8 On yolkej kalakij ijtik imintekal para ompa niyanaj. 9 Kampaka sur, ualeua on ajakakiautli, niman kampaka norte ualeua on sekutli. 10 Dios kilpitsa on atl niman nochiua hielo, niman ixko on ueyiatl nochiua hielo. 11 Yejua kitemiltia on moxtli ikan atl, niman kichiua para ompa ma ualeua on tlapetlanalistli. 12 Niman on tlapetlanilistli uajtsitsikuikatiu niman yau imanian cielo, para kichiua tlen Dios kinauatia ipan in tlajli. 13 Dios kuajtitlani on kiautli para katekiya in tlajli. Kamantika kuajtitlani para kincastigaroua on tlaltikpatlakamej, niman kamantika para kiteititia itetlajsojtlalis*.14 "Xnechpakaijyoui Job, niman xnechkaki tlinon nimitsijlia. Kuajli xkixtlalo nochi tlen Dios kualtsin okichijchiu. 15 ¿Tejua tikmatstikaj kenijki Dios kichiua para ma tlapetlani ipan on moxtli? 16 ¿Tikmatstikaj kenijki on moxtli ueli onkaj ipan cielo niman xuajxini tlatsintlan? Ompa tikitaj ika Dios nochi sanoyej kuajli okichijchiu pampa kipiya nochi tlamatkilisltli. 17 ¿Noso tikmatstikaj tline mitstonalmiktia motlaken ijkuak uajlau on totonki ajakatl yejuan ualeua kampaka sur? 18 ¿Tlen tejua otikpaleuij Dios para okipatlau on cielo, niman okichikau ken sen teposlaminaj?
19 "Xtechijli tej, tlinon tikijliskej Dios, pampa tejuamej xitlaj tikmatij, niman xtikmatij tlinon tikijtoskej. 20 Nejua nion xniknekiskia para itlaj nikijlis, pampa yejua uelis nechmiktis. 21 Ijkuak on ajakatl kichipaua on cielo, on tonaltsintli xakaj ueli kita. 22 Ne kampaka norte uajnesi sen petlanalistli sanoyej kualtsin kostik. On nochiua ijkuak Dios technotitia itemojtijueyilis. 23 Tejuamej xueli tiknisiuiyaj on Dios yejuan ueli nochi kichiua. Yejua kipiya nochi fuerza, niman kichiua nochi tlen kuajli. No ijki, yejua yolmelajki niman xakaj kitlajyouiltia. 24 Yejua ika ne ixpan, on tlakamej kimakajsij. Yejua kinmixtlajsojtla on yejuan nokuitiaj sanoyej tlamatkej*."