Eliú otlajtoj ika naupa
36
Kemaj Eliú okijtoj: 2 "Xnechpakaijyoui achijtsin, niman nimitsititis ika nikpiya más miyek tlinon nimitsijlis de Dios. 3 Nikijtos nochi tlinon nikmatstikaj de Dios yejuan onikixtij ipan keski amammoxtli, niman ijkon tikmatis ika noDios, yejuan onechchijchiu, yolmelajki. 4 Nejua nimitsijlis nochi tlen melauak; ¡mixpan nemi sen tlakatl yejuan melauak sanoyej tlamatki*!5 "Dios yejuan nochi ueli kichiua sanoyej tlamatki*, niman xakaj kichichiua. 6 Yejua kinkixtilia iminnemilis on yejuan xkuajkualtin tlakamej, pero on yejuan mayankej, uej kimpaleuiya para makasa kintlajyouiltikan on xompayejyejkej. 7 Yejua nochipa kincuidaroua on tlakamej yejuan yolmelajkej, niman kintlalia ken reyes para ma tlamandarokan nochipa. 8 Pero tla imimpan uajlau tlajyouilistli pampa itlaj xkuajli kichiuaj, tla kintsakuaj ipan cárcel niman kinsalouaj ikan teposcadenas, 9 Dios kintitia ika xkuajli tlinon okichijkej niman ika otlajtlakojkej pampa onoueyimatkej. 10 No ijki, Dios kichiua para ma kakikan kinchikajkaajua para makasa tlajtlakokan yej ma noyolpatlakan. 11 Tla yejuamej kakij tlen Dios kinmijlia niman kitlakamatij, nemiskej ikan pakilistli niman nochipa kuajli nemiskej ipan iminnemilis. 12 Pero tla xkinekij kakiskej tlen Dios kimijlia, Dios kintekauilis ma kinmiktikan ipan sen guerra kenon yejuan xtlamatkej.
13 "On yejuan xmelauak kineltokaj Dios, maski Dios kincastigaroua, xkitlajtlaniliaj ma kimpaleui. 14 Yejua ika, mikij sanken telpokamej niman mikij sanoyej tepinajtij pampa mikij kenon yejuan auilnenkej. 15 Dios kinmachtia on tlakamej ika on tlajyouilistli. Ika on iminnekokol, yejuamej kiseliaj kajsikamatilistli. 16 Dios no ijki omitskixtij de on tlen xkuajli, niman mitsuikas kampa xok titlajyouis, kampa mitsmakas miyek uelik tlakuajli. 17 Tejua no ijki noneki tiktlaxtlauas motlajtlakol ken kitlaxtlaua itlajtlakol sen xompayejyeua, niman xuelis itlaj tikchiuas para xmitsyolkuitiskej niman xmitstlajtlakolmakaskej. 18 Maka tikmokauilis ma mitsichtakatlaxtlauilikan para tikchiuas tlen xkuajli, niman maka mitsyoltilanas on miyek tomin. 19 Nochi on riquezas niman nochi on tlajtlamach ika timotekimaka xuelis mitspaleuis ijkuak titlajyouis. 20 Maka xtlajtlani ma tlayouatetsi ijkuak on tlakamej popolouij.a 21 Maka oksejpa tias ipan tlajtlakojli, pampa on tlajyouilistli yejua ika mopan ouajlaj para maka titlajtlakos.
22 "Xkita ika Dios kipiya sanoyej ueyi poder, nion xnemi sen temachtijketl ken yejua. 23 Xakaj uelis kijlis Dios tlinon kichiuas, nion xakaj uelis kitechtis ika okichiu itlaj xkuajli. 24 Nochi tlaltikpaktlakatl kiueyiteneua on tlen Dios kichijchiua ikan ipoder, tejua no maka tikelkauas tikueyiteneuas Dios. 25 Nochi tlakatl ueli kita nochi on tlen Dios okichijchiu, maski san uejka. 26 Dios sanoyej ueyixtikaj, niman xueli tikajsikamatij; nion xuelis tikpouaskej keski xipan kipiya.
27 "Dios kichiua para on atl ma ijpotokisa, niman kemaj kuepa kiautli. 28 On kiautli ualeua ipan on moxtli, niman ijkuak kiaui, miyek atl toyaui imimpan on tlaltikpaktlakamej. 29 ¿Akinon ueli kajsikamati ken nejnemi on moxtli? noso ¿yakaj kajsikamati tline chikauak tlakomoni ipan on cielo? 30 Dios kuajli tlauiloua ipan on mar ika on tlapetlanajli, pero ne kampa más uejkatlan ijtik on mar on tlapetlanajli sa onnesi ken ixtlakatsajkan 31 Ika on kiautli, Dios kichiua para ma onya tlakuajli para nochi tlakatl, niman miyek tlakuajli kiminmaka. 32 Ikan imauan kitskia on tlapetlanajli, niman kititlani kampaka yejua kineki. 33 On tlakomonali techmachistia ika ye uajlau on ajakakiautli, niman on ajakakiautli techmachistia ika Dios kualani ipampa on xompayejyejualistli.