Eliú otlajtoj ika yexpa
35
Kemaj Eliú okijtoj: 2 "Job, ¿Tlen tikuitia kuajli ika tikijlia Dios tejua más tikuajli xken yejua? 3 Tejua otikijlij Dios: '¿Tlinon ika ninotas noso tlinon niktlanis tla xnitlajtlakos? ¿Tlinon daño nimitschiuilia tla nitlajtlakoua?'4 "Nejua nikneki nimitsnankilis, niman no nikinnankilis motlajsojkaikniuan. 5 Xontlacha ipan on cielo, niman xkita ken tlakpak onkaj on moxtli. 6 Tla titlajtlakoua, Dios xitlaj* tikchiuilia, maski sanoyej titlajtlakos, Dios xitlaj* daño tikchiuilis. 7 Niman no tla kuajli timouika, Dios xitlaj* kitlani; nion xitlaj* ika kipaleuiya on tlen tikchiua. 8 Yej, ijkuak titlajtlakoua tikinchiuilia daño on tlakamej ken tejua, niman tla tejua tikchiua tlen kuajli, yejuamej kiseliaj tlen kuajli.
9 On tlakamej ajmankachokaj, niman kinekij ma kimpaleuikan pampa sanoyej kintlajyouiltiaj on yejuan kipiyaj ueyi poder. 10 Pero xkitejtemouaj Dios yejuan okiminmakak iminemilis, niman kinyolchikaua ijkuak ximinyolika. 11 Yejuamej xkitejtemouaj Dios yejuan kiminmaka más kajsikamatilistli xken on yolkej, niman kiminmaka más tlamatkilistli xken on totomej. 12 On tlakamej tsajtsij para Dios ma kimpaleui, pero Dios, xkiminnankilia, pampa yejuamej xkuajkualtin tlakamej niman sanoyej nouejueyimatij. 13 Maski on tlakamej kitsajtsiliaj Dios para ma kimpaleui, Dios, yejuan nochi ueli kichiua, xkinkaki.
14 "Tejua tikijtoua xtikita Dios, pero xtlamacha itech, pampa on tlen mopan nochiua yejua ye kimatstikaj, niman san noneki tikchas para mitspaleuis. 15 Tejua tikijtoua, Dios xkualani nion xtecastigaroua, nion xsanoyej kita on tlajtlakojli. 16 Pero tejua Job, xtikmati tlinon tikijijtoua, maski sanoyej titlajtlajtoua, xtiktekitiltia motlamachilis."