Eliú otlajtoj ika okpa
34
Kemaj Eliú okijtoj: 2 "Nemejuamej yejuan nentlamatkej* niman yejuan yonenmomachtijkej, xkakikan tlinon nikijtos. 3 Ijkon ken nemokamak ueli kimati ken uelik on tlakuajli, nemonakas no ueli kaki on tlajtojli para nenkimatij tla melauak noso ka. 4 Tla ijkon tej, tejuamej no ma tikixtlalokan in tlen nochijtikaj, niman ma tikitakan tlinon kuajli onkaj. 5 Job yokijtoj: xitlaj "tlajtlakojli "nikipiya", pero Dios noneneki kijtos ika niyolchipauak." 6 Job kijtoua ika tlakajkayauaskia tla kijtoskia kemaj kipiya tlajtlakojli. Pero maski xkipiya tlajtlakojli, sanoyej tlajyouiya.7 "Tla ijkon tej, xnemi okse tlakatl yejuan no ijki ken Job, yejuan kijtoua ika sanoyej kitlakaitaj Dios, niman yej kipijpinauiya Dios. 8 Yejua kuelita iminuan nosentlalia on xkuajkualtin tlakamej, niman iminuan on xompayejyejkej kistinemi. 9 Niman kijtoua, xitla kitlani on tlakatl maski kuajli nouikas ixpan Dios.
10 "Pero nemejuamej tlakamej tlamatkej*, xnechkakikan. ¡Maka nenkinemiliskej ika Dios, yejuan nochi ueli kichiua, xkuajli tlen kichiua, noso xkipiya yolmelajkanemilistli! 11 Yejua kitlaxtlauilia cada se tlinon kichiua; cada se kimaka tlinon kimelaua kiselis. 12 ToTEKO, yejuan nochi ueli kichiua, xkaman kichiua tlen xkuajli, yej nochipa kichiua tlen melajki. 13 Yejua xokiselij on poder itech yakaj para ueli kimandaroua nochi in tlaltikpaktli. 14 Tla toTEKO techkixtiliskia iespíritu yejuan ika otechmakak tonemilis, 15 tinochimej timikiskiaj, niman titokuepaskiaj tlalkuechtli.
16 "Tla tejua Job kuajli titlamachilisyej, xnechkaki; Kuajli xkaki tlinon nimitsijlis. 17 Tla Dios xkuelitaskia ma nochiua tlen melajki, xueliskia kimandaroskia in tlaltikpaktli. ¿Kenijki tej, tiueli tiktlajtlakolmaka Dios akin kichiua nochi tlen sanoyej kuajli? 18 Dios kintlajtlakolmaka on reyes niman on tlayekankej pampa yejuamej xitlaj kuajli kichiuaj niman xompayejyeuamej. 19 Dios xsan kimpaleuiya on yejuan uejueyixtokej, nion xsan kimpaleuiya yejuan más ricos, yej sano ijki kimpaleuiya on mayankej, pampa yejua nochimej okinchichijchiu. 20 Nochimej on ricos niman mayankej uelis mikiskej isijkapan. Ijkuak tlajkoiuan on tlakamej najkomanaj niman xnesi kanika yauij. On yejuan uejueyixtokej mikij maski xakaj tlakatl kinmiktia.
21 "Dios kita ken nouikaj on tlakamej niman kita tlinon kichiuaj. 22 On yejuan kichiuaj tlen xkuajli, xuelij niyanaj maski nemij kampa sanoyej tlayouatok. 23 Dios xkaman kijtoua kamanon kiyolkuitis sen tlakatl. 24 Yejua xachtoj tetlajtoltia tla kuajli para kinmejkuanis on yejuan uejueyixtokej, niman oksekimej kintlalis kampa yejuamej nemiyaj. 25 Dios kimatstikaj tlinon kichiuaj. Yejua ika, ijkuak tlayoua, yejkotetsi niman kinmiktia. 26 Kincastigaroua on xkuajkualtin kampa nochi tlakatl kinta, 27 pampa xokinekkej okitlakamatkej niman xonouikakej ipan itlanauatiluan yejuan okinmakak. 28 Sanoyej kintlajyouiltiayaj on yejuan mayankej, pero yejuamej onoueyikatsajtsilijkej itech Dios para ma kimpaleui, niman Dios okinkak. 29 Pero tla Dios xkinnankilia, xakaj uelis kualanis itechkopa. Tla yejua kiyanas ixayakatsin, xakaj uelis kitas. Yejua kinmitstikaj nochimej on tlaltikpaktlakamej niman nochimej on naciones de in tlaltikpaktli. 30 Niman yejua xkinkauilia on xompayejyejkej ma tlamandarokan, para maka tekajkayauakan.
31 "¿Tlen manin otimoyolkuitij itech Dios ika yotitlajtlakoj?, niman ¿manin otikprometerouilij ika aman xokaman titlajtlakos? 32 Xkijli ma mitsititi tlinon xkuajli tikchiua. Tla xkuajli otimouikak, xkijli ika xokaman ijki tikchiuas. 33 ¿Tikneki Dios ma mitstlaxtlauili ken tejua tikneki, maski xtikneki timoyolpatlas? Tejua timoneki tikijtos on tlen tikchiuas niman xnejua nikijtos. Xnechijli on tlen tiknemilia. 34 On tlakamej yejuan tlamatkej* niman yejuan tlamachilisyejkej yejuan nechkakiskej, no ijki kijtoskej ken nejua nikijtoua: 35 'Job xkimati tlinon kijtoua, niman itlajtol xitlaj kitosneki.' 36 ¡Job, kimelaua kiselis ueyi castigo pampa tenankilia ken sen tlakatl xompayejyeua! 37 “Job xsan sen tlajtlakolej, yej no xipanteita, niman tixpan tlamach kiteneuilia Dios.”