33
"Yejua ika tej, kuajli xnechkaki Job tlinon nimitsijlis. 2 Sa niknemilijtikaj tlinon nimitsijlis. 3 Nikijtos on tlen melauak nikmati ipan noyojlo, niman nimitsmelajkaijlis on tlen niknemilia. 4 Dios, yejuan nochi ueli kichiua, onechchijchiu, niman ika iEspíritu onechmakak nemilistli. 5 Xnechnankili tla tiueli; xtejtemouili ken tinechixnamikis.6 "Tejua niman nejua, tinochijkej ixpan Dios; tinochimej titlachijchijtin ikan sokitl. 7 Yejua ika tej, xkipiya para tinechmakajsis, pampa nejua xnimitschiualtis itlaj ken más niueyixtiaskia de tejua.
8 "Onikak mokamauijsokilis. Nikmati ken ijkin onimitskakilij otikijtoj. Ijkin onikak: 9 'Nejua niyolchipauak, xonkaj tlajtlakojli nopan; nikpiya melajkanemilistli niman xitlaj* nikchiua tlen xkuajli. 10 Pero Dios itlaj xkuajli okitak nopan; nechita ken yakaj itlauelikniu. 11 Yonechikxisasaloj ikan teposcadenas niman xok nechixkaua kampaka niau.'
12 "Pero on tlen yotikijtoj xmelauak, pampa Dios yejua más ueyixtikaj xken in tlaltikpaktlakamej. 13 ¿Tline tej, tikneki iuan timokamauijsokis Dios? ¿Tline tikijtoua ika yejua xkipiya tline kinnankilis on tlaltikpaktlakamej? 14 Dios technotsa sesentlamantik, pero tejuamej xkaman tikajsikamatij. 15 Kamantika technotsa tlayoua ijkuak tikochij; technotsa ipan sen temiktli noso ipan sen tlatlachalistli ken totemikpan. 16 Dios techichtakanotsa tonakasko, niman sanoyej techchikajkaijlia para kuajli ma titouikakan niman ma tikmakajsikan 17 para ijkon, makasa ma tikchiuakan on tlen xkuajli, niman no para makasa ma titoueyimatikan. 18 Niman ijki, techmanauis para maka tiaskej miktlan, niman para maka yakaj techmiktis. 19 Kamantika Dios kimelajkatlalia sen tlakatl ika sen kokolistli, niman ikan chikauak nekokojli ipan itlalnakayo. 20 Niman ijkuak on tlakatl kualo, nion xok apismiki. Maski on tlakuajli sanoyej uelik, yejua kelmoyaua. 21 Kemaj peua teuaktiu, hasta pankisaj iomiyouan. 22 Inemilis ijkon tlantiu hasta kaman miki.
23 "Manin ompa nisiu nemi sen ángel tepantlajtoketl, yejuan kisa itech on se mil ángeles niman yejua kijlis tlinon kuajli para kichiuas. 24 Niman on angel kiknelis niman kijlis Dios: 'Xmakixti para maka mikis pampa onkaj tlaxtlauijloj inemilis.' 25 Kemaj, inakayo nokauas ken inakayo sen konetsintli, nokauas ken ijkuak telpochtli katka, 26 Niman yejua noueyikatsajtsilis itech Dios, niman Dios kinankilis; ikan paktli kitas ixayatsin Dios. Kemaj Dios kimakas yolmelajkilistli. 27 Niman on tlakatl ijkin kiteixpantilis: 'Onitlajtlakoj; onikchiu on tlen xkuajli, pero Dios xonechcastigaroj. 28 Yej onechmanauij para xonimik, niman aman sanken* ninemi.'
29 "Dios ijkin kichiua, miyekpa kichiua, 30 para techmanauiya de on mikilistli, niman sanken* techkauilia ma tinemikan. 31 Kuajli xkaki Job, maka tinauatis chika nitlajtoua. 32 Pero tla tikneki itlaj tinechijlis, xnechijli, pampa nejua nikneki nikmatis tla xtikpiya tlajtlakojli. 33 Pero tla ka, maka xnauati, yej xnechkaki niman nejua nimitsititis ken titlamatki* yes."