Eliú okinnotz itlajsojkaikniuan Job
32
Ijkuak on yeyimej tlakamej okakkej ika Job notenkojtiliaya ika xkipiya tlajtlakojli, xokuitlaj okijlijkej.2 Kemaj sen tlakatl yejuan itoka Eliú, sanoyej okualan, niman xok okixikoj kaktias Job ika kijtouaya xkipiya tlajtlakojli, niman yej Dios kitlajtlakoltiaya. (Eliú, ikoneu katka Baraquel, yejuan buzita katka niman iuejkakoneu* kakta Ram.) 3 Niman no, okualan intechkopa on yeyimej itlajsojkaikniuan* Job, pampa xouelkej okitlajtlakolmakakej Job, niman ijkon nesi yej Dios kipiya tlajtlakojli. 4 Niman pampa Eliú más konetl kakta xken nochimej yejuamej, okichix ma tlamikan tlajtlajtokan iuan Job. 5 Pero ijkuak okitak ika on yeyimej itlajsojkaikniuan* Job xok kimatiyaj tlinon más kijliskej sanoyej okualan, 6 niman kemaj yejua opeu tlajtoua.
Achtoj tlajtoltin yejuan okijtoj Eliú
Ijkin okijtoj: "Pampa nejua más nikonetl niman nemejuamej nenueuentsitsimej, xniknekiya nikijtos tlinon niknemilia. 7 Nejua niknojliaya: 'Ma tlajtokan on yejuan ueuentsitsimej pampa on tlamatkilistli noskaltia iuan innemilis.' 8-9 Pero nejua nikijtoua, se xnoneki ueuentsin yes para tlamatki* yes, pampa on toTEKO yejuan nochi ueli kichiua, yejua kitlalia iespíritu topan para ma tikpiyakan tlamatkilistli niman kajsikamatilistli. 10 Yejua ika, nemechijlia, nejua xnechkakikan, pampa nejua no nikpiya tlinon nikijtos.
11 "Nejua san nitlakaktikatka chika nemejuamej nentlajtlajtouayaj, niman hasta nenkitejtemouiliayaj kenijki nentlajtoskej 12 Kuajli yonemechkak, pero no yonikak ika nion semej nemejuamej xueli nenkinankiliaj Job ken kimelaua. 13 Maka yej nennechijliskej yejua más tlamatki*, niman xakaj okse uelis kinankilis, yej san toTEKO uelis kinankilis. 14 Niman pampa Job xnejua nouan otlajtlajtoj, nejua xniknankilis ken nemejuamej onenkinankilijkej. 15 Job, yejuamej in yeyimej tlakamej xok nauatij pampa xok kimatij kenijki mitsnankiliskej. 16 Pero maka tiknemilis ika nejua no xninauatis san pampa yejuamej xok ueli itlaj mitsijliaj. 17 Nejua no nitlajtos; nikijtos tlinon niknemilia. 18 Sanoyej miyek nikpiya tlinon nikijtos, hasta niknekiskia ma nitlajtojtetsi. 19 Tla xnitlajtlatos, machisti ika nitoponis, ken sen kuetlaxtekomatl yejuan ye tsayantikaj pampa tentika ikan vino yejuan posonki. 20 Ika onkaj nitlajtos para nimitsnankilis niman para niyolseuis. 21 Xakaj nikchikoitas, nion xakaj nikuajlinotsas. 22 Nejua xninomati para se nikuajlinotsa. Tla ijkon nikuajlinotsaskia, noTEKO yejuan onechmakak nonemilis, nimantsin nechcastigaroskia.