31
"Nejua oninonauatij ika xkaman nikintas on ichpokamej ikan xkuajli eleuilistli. 2 ¿Tlinon kimaka Dios yejuan nochi ueli kichiua, sen tlakatl, desde ne iluikak? 3 On tlajtlakolej tlakatl kiselis ueyi problemas; on xompayejyeua kimelaua kiselis tlajyouilistli. 4 Dios kita nochi tlen nikchiua; yejua kita kampaka nikistinemi.5 "Nejua ikan tlajtolmakalistli ixpan Dios nikijtoua ika xkaman nistlakati, nion xkaman yakaj nikajkayaua. 6 Ma Dios nechyolkuiti, niman yejua kitas ika xnikpiya tlajtlakojli. 7 Tla oniktlalkauij on kuajli ojtli, tla itlaj onikteeleuilij, noso tla itlaj oniktekuilij, 8 tla ijkon, oksekimej ma kuakan on tlen nejua oniktôkak, niman ma kuiuitlakan on notlatok.
9 "Tla oniknokauilij ma nechnejneki sen siuatl, noso tla onikpijpix isiuau nonisiuchanejkau para nikeleuis niman nikuilis, 10 tla ijkon, nosiuau ma kitlakualchiuili okse tlakatl, niman oksekimej tlakamej iuan ma notekakan. 11 Ijkon noneki nochiuas pampa on eleuilistli de sen siuatl sanoyej xkuajli, niman ika onkaj nikselis castigo. 12 On castigo yeskia ken itlaj tlitl yejuan nochi kitlatia. Kitlatiskia nochi tlinon nikpiya.
13 "Ijkuak notekitkauan nechijliayaj itlaj xkuajli nichiua intsajlan, nejua nochipa onikimpaleuij ken kitocaroua. 14 Tla xijkon nikchiuaskia, ¿tlinon nikijliskia Dios ijkuak najsiskia itech? ¿Kenijki niknankiliskia ijkuak nechtlajtoltiskia kenijki oninouikak? 15 Ijkon ken Dios onechchijchiu, no okinchijchiu notekitkauan; nejua onechmakak nemilistli, niman no ijki okiminmakak nemilistli.
16 "Nejua xkaman oninonenek nikpaleuis yejuan mayanki ijkuak itlaj nechtlajtlaniliaya, niman yejuan kaualtsintli nochipa onikmakak tlakuajli. 17 Xkaman onitlakuaj noselti chika sen iknotl uej apismiki. 18 On yejuan iknotl nochipa onikitak ken niitataj yeskia, niman on yejuan kaualtsitsimej nochipa onikinmanauij. 19 Ijkuak se nikitaya xkipiya itlaken, noso xkipiya tlinon ika notlapachos, 20 nikmakaya tlakentli yejuan tlachijchijtli de itsojmiyo noborregos para ma noxotlalti, niman yejua nechtlajsojkamachiliaya. 21 Xkaman ika oninauiltij sen iknotl, san pampa iminuan ninopoua on jueces 22 Niman tla nochi in xmelauak, ma pojpostekikan nomauan, niman ma nimastlakapalkojkopini. 23 Nejua nikmakajsi icastigo Dios; ¡xnikxikos nopan uajlas itemojtij ueyilis!
24 "Xkaman oniktlalij noyojlo ipan on oro nion ipan on riquezas. 25 Tla nejua nikpiyaya miyek riquezas niman niktlaniya miyek tomin, xejua ika nikpiyaya pakilistli. 26 Nejua sanoyej nikuelitaya nikita ken petlani on tonaltsintli, niman ken petlani on metstli, 27 pero xkaman onikinichtakamauistilij, nion onikintenkuaj* san de uejka ikan noma para onikintlakaitak. 28 Tla ijkon nikchiuaskia, nechmelauaskia nikselis on castigo, pampa nitlajtlakoskia ixpan toTEKO yejuan nemi ne iluikak.
29 "Nejua xkaman ika oniuetskak notlauelikniu ijkuak itlaj xkuajli ipan nochiuaya, nion xkaman oniknekilij itlaj ipan ma nochiua tlen xkuajli. 30 Xkaman onikuijuikaltij, nion xkaman oniknekilij ma miki. 31 Notekitkauan xkaman okinkajkej ikan apistli on yejuan xchanejkej. 32 Niman on yejuan xchanej xkaman onikauilij ma kochi ipan calle. Nochipa oniknots para ma kalaki niman ma kochi ijtik nokal. 33 Nejua xkaman onikiyan notlajtlakoluan ken kichiuaj oksekimej, nion xkaman nikichtakachiua tlen xkuajli 34 para maka nechtejteneuaskej. Xkaman ninokaltsakuaya niman xok nitlajtouaya para maka nechtejteneuaskej.
35 "¡Kuajli yeskia tla yakaj nechkakiskia! Maski notlauelikniu kichijchiuas sen amatlajkuilojli kampa nechteixpanuiskia, nejua niktlalia noyojlo itech toTEKO yejuan nochi ueli kichiua ika yejua nechmanauis. Notlauelikniuan ma kijkuilokan ipan sen amatlajkuilojli on tlen xkuajli onikchiu. 36 Niman on tlinon kijtoskej ipan on amatlajkuilojli nikselis niman niktlalis ikan paktli, ken nikseliskia sen corona. 37 Nejua nikixpantilis Dios nochi tlen onikchiu, ninonisiuis ixpan Dios ken niikoneu yeskia sen rey.
38 "Tla onikichtek on tlajli yejuan aman nikpiya, yejuan onikuilij on yejuan achtoj itlal katka, 39 noso tla yakaj onikuilij on tlen otlak kampa otôkak noso tla xonikintlaxtlauilij notlakeualuan ken kitocaroua yejuan otlatôkakej ipan notlal, 40 tla ijkon, ¡maka sa ma tlaki trigo ipan notlaluan, yej nochi uitstli ma kisa, niman maka ma tlaki cebada, yej nochi xkuajli xojtli ma onya!"
Ijkin otlan tlajtoua Job para onomanauij.