30
"Pero aman noka uetskaj on yejuan más telpokamej xken nejua, yejuan imintajuan xkaman nikinmakas tekitl para ma kimpaleuikan notskuiuan yejuan kintlajpiyaj noborregos 2 ¿Tlinon ika nechpaleuiskiaj? Yejuamej nion xok makojkojtikej, 3 pampa sanoyej temojtij ken mayanayaj niman semi xtlakuayaj. Ijkuak tlayoua, yayaj uejka kampa tlakauyan para kontetejxouayaj kojneluamej yejuan uakej. 4 Konuiuitlayaj xojtli yejuan chichik ipan tlakotepajsojli para kikuayaj, niman kisentlaliayaj ineluayouan nextamalkojtli para kitlatiayaj niman ika nototoniayaj. 5 Yejuamej xakaj kiminnekiya, kintsajtsiliayaj ken yakaj tlachtekkej. 6 Chantiyaj ijtik ostokaltin, ipan atlautin niman ipan teostomej. 7 Kuaochokayaj ken itlaj kokoyomej ijtik tlakoyoj niman nosentlaliayaj intsajlan uitskojtin. 8 Yejuamej xitlaj uelij kichiuaj. Xakaj kimati ken imintoka, niman xakaj kintlakaita. Yejua ika, okinuajkixtijkej inkalpan.9 "Aman, yejuamej noka uetskaj, niman nopan kamanalouaj. 10 Nechtlalkauiyaj pampa nechtlajyelitaj, niman hasta nechchijchaj nixko. 11 Aman, pampa Dios yonechixpoloj, xok yakaj nechtlakaita. 12 Miyekej nechajteyeualouaj para tlamach nechalijliaj, niman nechmajmapeuaj para ma niuetsi niman ma nimiki. 13 Nechtlaliliaj tlatlalijli para nechchiualtiaj ma ninesi ika xnikuajli tlakatl, niman xakaj nechmanauiya. 14 Nopan okalakkej ikan chikauak kakistilistli ken kichiuaj on soldados ijkuak kitekoyoniaj para kalakij ipan sen tepanchinantli. 15 Nopan ouajlaj sen ueyi nemojtijli. On tlakaitalistli yejuan nechpiyaliayaj, oyaj ken itlaj ajakatl. On kuajli nemilistli yejuan nikpiyaya, opopoliu ken itlaj moxtli.
16 "Aman nejua xok nikneki ninemis; notlajyouilis xok nikxikoua. 17 On tlen tekokoj kalaki hasta ipan noomiyouan niman xkaman tlami; ijkuak tlayoua sanoyej ninokokoua niman sanoyej nitlajyouiya. 18 Dios yonechajsik ipan nokechkojyo, niman sanoyej chikauak kitsejtseloua notlaken. 19 Yonechtlajkal ipan sokitl ken kixiniskia itlaj tlalkuechtli niman tlikonextli.
20 "Timitstlajtlanilia noDios xnechpaleui, pero tejua xtinechnankilia. Niuajlau mixpan, pero tejua ken xtinechitasia. 21 Noka timauiltia hasta kampa xok ueli. Ikan nochi mopoder, tinechtlaueltotoka. 22 Tikchiua para on ajkomalokotl ma nechuika, niman on ajakakiautli ma nechtsejtselo. 23 Ye nikmatstikaj ika tejua tikneki ma nimiki, para tinechuikas kampa yauij nochimej on yejuan mikij.
24 "Nejua nochipa onikpaleuij yejuan mayanki ijkuak nechtlajtlaniliaya ma nikpaleui. 25 Nochipa nichokaya ipampa on yejuan tlajyouiya, niman nochipa onikiknelij yejuan xitlaj* kipiya. 26 Nejua nikchaya nikpiyas pakilistli, niman yej nopan oualaj ajmantli; nikchaya tlauijli, niman yej ouajlaj tlayouajlotl. 27 Xueli ninoteltia ika najmankamiki; mojmostla nitlajyouiya. 28 Ipan nonemilis onkaj ajmantli; para nejua ken nochipa moxtentok. Imixpan nochimej nitlajtlani yakaj ma nechpaleui. 29 Pero aman nechitaj ken niinmikniu on tepeyolkej imintoka chacales, niman ken notlajsojkaikniuan yeskiaj on uejueyitotomej imintoka avestruces. 30 Nochi nokuetlaxyo yotlileu, niman notlalnakayo sanoyej chikauak totonia. 31 Aman, yej najmankachoka ijkuak on arpas niman on akatlapitsaltin nikinkaki.