Job okelnamik on paktli yejuan kipiyaya
29
Job oksejpa otlajtoj, niman ijkin okijtoj: 2 "¡Kuajli yeskia tla oksejpa ninemiskia ken ninemiya ipan on tonaltin ijkuak Dios nechmanauiyaya! 3 Ijkuak yejua nechtlauiluiyaya ika itlauil, nejua niueliya nikistinemiya kampaka tlayouatok. 4 Ijkuakon, nichikajtikatka niman Dios cuidarouaya nochan. 5 Niman Ijkuakon, Dios yejuan nochi ueli kichiua nouan nemiya, niman nokoneuan nouan nemiyaj. 6 Sanoyej miyek leche nikixtiaya de nouakaxuan, niman sanoyej miyek aceite nikixtiaya ipan on olivos kojtin* yejuan nikimpiyaya. 7 Ijkuak iminuan ninotlaliaya on uejuetkej tlajtlajmatkej ipan on ueyikalpan, 8 on telpokamej ijkuak nechitayaj, nejkuaniayaj para ma nipano, niman on ueuentsitsimej notelketsayaj para nechtlakaitayaj. 9 On yejuan tekiuajkej xok nauatiyaj, niman kiteichtakaijliayaj para makasa ma nauatikan. 10 Hasta on yejuan más uejueyixtokej xok nauatiyaj, kenon inkamak pepechiuiskia innenepil.11 "Nochimej yejuan nechitayaj noso nechkakiyaj, nechpakateneuayaj, niman sanoyej kuajli nechteneuayaj ika on tlen onikchiu. 12 Ijkon okichijkej pampa nejua nikinpaleuiyaya on iknomej niman on mayankej. Ijkon tej, nikimpaleuiyaya on yejuan xakaj kimpaleuiyaya. 13 On yejuan xokuitlaj kipiyayaj, nechmakayaj tlaxtlauijli pampa nikimpaleuiyaya. On yejuan siuakakaualtsitsimej sanoyej pakiyaj pampa nikimpaleuiyaya. 14 Nochi nikchiuaya tlen kuajli niman tlen melajki. Nikchiuaya mojmostla ken itlaj notlaken niktlaliskia. 15 ¡Nejua nikpaleuiyaya yejuan xtlacha, niman nikpaleuiyaya yejuan uilatsin. 16 Ken niimintataj katka on yejuan mayankej, niman nikinmanauiyaya on yejuan xchanejkej! 17 Onikinkuilij imimpoder on xkuajkualtin tlakamej niman xok onikinkauilij ma kichiuakan tlen xkuajli.
18 "Niman nejua ijkin nikijtouaya: “Nejua sanoyej niueuentsintias ijkuak nimikis, niman nimikis nochan nisiu iuan nofamilia, 19 pampa nejua niken on kojtli* yejuan ijkak itenko atl, niman yejuan imajmauan patsiuij ikan ajuichtli yejuan xini tlayoua. 20 Noueyilis nouan oyenkuiyak, niman nochikaualis xkaman onikpoloj.”
21 "Nochimej nechkakiyaj, niman xok yakaj nauatiya ijkuak nikintlakanonotsaya. 22 Ijkuak nejua tlamiya nitlajtoua, xakaj kijtouaya tla xkuajli tlen onikijto, niman ikan paktli kiseliayaj nochi tlinon nikimijliaya. 23 Yejuamej sa kichayaj itlaj ma nikinmijli, ken ijkuak se sa kicha on kiautli ijkuak sanoyej tona. 24 Ijkuak nejua nikinmixuetskiliaya yejuamej sanoyej pakiyaj, niman ijki nikinyolchikauaya. 25 Nejua nikinmijliaya kenijki noyekanaskej, niman nejua nikijtouaya tlinon kichiuaskej. Nikatka ken sen rey yejuan yaya inyakapan isoldados. Ijkuak najmanayaj, nejua nikinyolchikauaya.