28
"Onkaj kampa kixtiaj on plata, niman on oro kichipauaj ijtik sen horno. 2 On tepostli hierro kixtiaj ijtik tlajli, niman on tepostli cobre kixtiaj ipan on temej ijkuak kimpatlaj. 3 Para on tlakamej mineros, xok onkaj kampa tlayouatok kampa yejuamej ontemouaj kampa más uejkatlan, niman kampa más tlayouatok para kontejtemouaj tetsitsimej yejuan kualtsistimej. 4 Nopilouaj ikan mekamej para koyonijtiuij kampa kinkixtijtiuij on temej yejuan onkaj uejka tlaijtik kampa xakaj chanti, kampa xkaman yakaj yau. 5 In tlajli, tlapani kitlakitia trigo, pero tlaijtik, nenelijtikaj ken itlaj tlitl. 6 Ijtik in tlajli onkaj on tetl itoka zafiro, niman onkaj oro yejuan nelijtikaj iuan tlajli. 7 On totomej intoka halcones ompa ne xkaman kitaj, nion on totomej yejuan nakakuanij ompa xkaman yauij. 8 Ompa, xkaman yauij on yolkej tekuanimej, nion sen león xkaman ompaka panotinemi. 9 On tlakamej kintekij on temej yejuan más chikajkej, niman kinmichkuaj on tepemej desde tlatsintlan. 10 Yejuamej kikoyoniaj on teostomej, niman ompa kinextiaj on tlajtlamach* yejuan kualtsitsimej. 11 Kinextiaj kampa meyaj on ríos, niman kixtiaj on tlajtlamach* tlen iyantikaj.12 "¿Pero on tlamatkilistli uej kanon ualeua? ¿Kanon onkaj on kajsimatilistli? 13 On tlakamej xkimatij ken sanoyej ueyi kijtosneki, niman ipan in tlaltikpaktli xkinextiaj. 14 On uejkatlan atl kijtoua: “Nikan xonkaj on tlamatkilistli,” niman on mar no kijtoua: “Nikan xnikpiya.” 15 On tlamatkilistli xuelis tikouas ikan oro, nion xuelis tikouas ikan plata. 16 Xuelis tiktlaxtlauas ikan oro yejuan más patioj, nion ika on tetsitsimej más kualtsitsimej yejuan intoka cornalina niman zafiro. 17 On tlamatkilistli más patioj xken on oro niman xken on tetl itoka diamante. Xuelis ika tikpatlas on tlajtlamach* yejuan tlachijchijtli ikan oro yejuan más patioj. 18 On tlamatkilistli, yejua más kualtsin xken on tetl itoka coral, niman xken on tetsitsimej intoka perlas*. Niman más kualtsin xken on oksekimej tetsitsimej yejuan kualtsitsimej. 19 Más kualtsin xken on tetl itoka topacio yejuan onkaj ipan on país Etiopía, nion uelis tikouas ikan oro yejuan más patioj.
20 Tla ijkon tej, ¿kanon ualeua on tlamatkilistli? ¿Kanon onkaj on kajsikamatilistli? 21 Yejua iyantikaj para maka yakaj ma kinexti, nion on totomej yejuan patlantinemij ipan cielo xkitaj. 22 On tlaxoxotonilistli niman on mikilistli kijtouaj: “Tejuamej san tikakij ika onkaj on tlamatkilistli .”
23 "Pero Dios san yejua kimatstikaj kanon onkaj, niman san yejua ueli ajsi kampa onkaj, 24 pampa yejua kixmati in tlaltikpaktli hasta kampa ontlami, niman kita nochi tlinon onkaj tlatsintlan de on cielo. 25 Ijkuak Dios okimakak ifuerza on ajakatl niman okitlalij kampa tlantias on atl, 26 ijkuak okitlalij kamanon kiauis niman okitlalij kanika ajakakiauis, 27 okitak ika on tlamatkilistli ompa onkatka. Niman Dios okixtlaloj on tlamatkilistli, niman okitak ika sanoyej kuajli niman sanoyej ueyi kijtosneki. 28 Kemaj Dios okinmijlij in tlaltikpaktlakamej: “Tla nennechtlakamatij niman nennechtekipanouaj san nejua nemoTEKO, kijtosneki nenkipiyaj tlamatkilistli, niman tla nenkitlalkauiyaj nochi on tlen xkuajli, kijtosneki nenkipiyaj kajsikamatilistli.”