Job otlan tlajtoua iuan itlajsojkaikniuan
27
Job oksejpa opeu tlajtoua, niman ijkin okijtoj: 2 "Ninotlajtolmaka ika itokatsin Dios yejuan nochi ueli kichiua, yejuan xok kineki nechpaleuis ikan mejlajkilistli niman nechmaka miyek ajmantli, 3 yejuan chika nechmaka nonemilis, niman nechmaka nijyo, 4 xkaman nitlakajkayauas, nion xkaman nikijtos tlen xmelauak. 5 Chika nejua ninemi, nochipa nikijtos ika nejua xitlaj* nikchiua tlen xkuajli. !Xkaman nemechijlis melauak tlen nenkijtouaj! 6 Nochipa nikijtos ika nejua niyolchipauak; xnikpiya tlinon ika nipinauas.7 "Niman nochimej notlauelikniuan, imimpan ma nochiua on tlen imimpan nochiua on xkuajkualtin tlakamej niman on yejuan xyolchipajkej. 8 ¿Tlinon ika nomanauis sen tlakatl yejuan xompayejyeua ijkuak Dios kuixtilis inemilis? 9 Ijkuak nemis ipan tlajyouilistli niman kitsajtsilis Dios para ma kipaleui, Dios xkakis. 10 On xompayejyeua xkaman kineki kitokas Dios, niman on xompayejyeua xkaman kitlajtlanilia ma kipaleui.
11 "Nejua nemechixpantilis nochi tlen Dios ueli kichiua; xnemechiyanilis tlinon Dios yejuan nochi ueli kichiua okitlalij ipan iyojlo para kichiuas. 12 Niman tla nemejuamej yonenkitakej ipoder, ¿Tline san tlamach nenkijijtouaj yejuan xitlaj kitosneki?
Zofar okinankijlij Job
13 "In yejua icastigo Dios yejuan nochi ueli kichiua, kiminmakas on xkuajkualtin tlakamej, on xompayejyeuamej: 14 Maski inkoneuan miyekej yeskej, mikiskej ipan nouijsokilistli, noso mikiskej ikan apistli. 15 Niman on yejuan nokauaskej, mikiskej ikan kokolistli, niman insiuakaualuan xkinchokiliskej.
16 "Maski on tlakatl xompayejyeua sanoyej kimiyekilis plata ken itlaj tlalkuechtli, niman maski kipiyas sanoyej miyek itlaken, 17 okse tlakatl yejuan kuajli nouika kitekitiltis on tlakentli, niman sen tlakatl yejuan kipiya tlakaitalistli kiselis on plata. 18 Niman ikal yejuan kichijchiuas semi xkojtik yes, yej ken sen tekatsauajli, noso ken ikajkal sen mijlajtlajpixki.
19 "Iyolika notekas kochis pampa kimatstikaj kipiya miyek riquezas, pero ijkuak tlanextilis, xokuitlaj kipiyas. 20 Ijkuak tlajokaj, kipiyas temojtij nemojtijli, niman ijkuak tlayoua kuikas on ajakakiautli. 21 On chikauak ajakatl yejuan ualeua kampaka ikisayan tonaltsintli, kantikisa on tlakatl ipan ichan niman uejka kontlajkalis. 22 Dios xok kiknelis ijkuak castigaros, niman xuelis nomanauis maski kinekis. 23 Pero nochi tlakatl kipijpinauiya niman kuejuetskilia.