Job kitlajtolkotona Bildad
26
Kemaj, Job ijkin okijtoj: 2 "¿Ijkin tiknemilia tinechpaleuiya nejua yejuan xok nikojtik? ¿Ijkin tinechmanauiya yejuan xok nikipiya nochikaualis? 3 ¿Ijkin tiueli tinechtlakanonotsa, niman tinechmachtia nejua yejuan xitlaj* nikmati? 4 ¿Akinon otikakistilij on tlajtoltin yejuan otikijtoj? niman ¿tlinon tiknemilijtikatka para ijkon otitlajtoj?Bildad okinankijlij Job
5 "On mikatsitsimej sanoyej kuekuetlakaj, ijtik on uejkatlan mar. 6 Ixpan Dios hasta ne miktlan, xakaj ueli niyana. Xitlaj iyantikaj ixpan. 7 Dios okitlalij on cielo kampa xitlaj* onkaj, niman in tlaltikpaktli okitlalij ipan ajakatl. 8 Yejua kejeua on atl ijtik on moxtli, niman on moxtli xtoponi maski on atl sanoyej yetik, 9 Dios kixtsakua on metstli; kixtlapachoua ikan moxtli. 10 Yejua okitlalij kanon tlantias on mar, no ijki ken okitlalij kanon tlantias on tlastajlotl niman kanon tlantias on tlayouajlotl. 11 Ijkuak Dios kijtoua ika kuajtitlanis icastigo, on tepemej yejuan ipan onkaj on cielo kuekuetlakaj. 12 Dios ika ipoder kichiua para on mar ma koxoni noso ma notelti, niman ika itlamatkilis* okitlan on temojtij yolki Rahab yejuan nemi ipan on mar. 13 Dios okilpits on cielo para otlachipau, niman ika ima okimiktij on temojtij kouatl xipetstik.
14 "Nochi in san se achijtsin de nochi on tlinon Dios ueli kichiua ikan ipoder. ¿Akinon uelis kajsikamatis ijkuak Dios kipannextis nochi ipoder?"