10
On yejuan otitlafirmarojkej, nikan nestikaj totoka: Nejua Nehemías, yejuan niikoneu Hacalías niman nigobernador, niman Sedequías,On tiopixkej yejuan otitlafirmarojkej, nikan nestikaj totoka:
2 Seraías, Azarías, Jeremías,
3 Pasur, Amarías, Malquías,
4 Hatús, Sebanías, Maluc,
5 Harim, Meremot, Obadías,
6 Daniel, Ginetón, Baruc,
7 Mesulam, Abías, Mijamín,
8 Maazías, Bilgai niman Semaías.
Yejuamej in tiopixkej katkaj.
9 On levitas yejuan no otlafirmarojkej katkaj:
Josué, ikoneu Azanías;
Binuy, iuejkakoneu* Henadad,
niman Cadmiel.
10 Niman imintlakaxijuan katkaj:
Sebanías Hodías, Kelita, Pelaías, Hanán,
11 Micaía, Rehob, Hasabías,
12 Zacur, Serebías, Sebanías,
13 Hodías, Bani niman Beninu.
14 On tlayekankej de on nación yejuan no otlafirmarojkej katkaj:
Paros, Pahat-moab, Elam, Zatu, Bani,
15 Buni, Azgad, Bebai,
16 Adonías, Bigvai, Adín,
17 Ater, Ezequías, Azur,
18 Hodías, Hasum, Bezai,
19 Harif, Anatot, Nebai,
20 Magpías, Mesulam, Hezir,
21 Mesezabeel, Sadoc, Jadúa,
22 Pelatías, Hanán, Anaías,
23 Oseas, Hananías, Hasub,
24 Halohes, Pilha, Sobec,
25 Rehum, Hasabna, Maasías,
26 Ahías, Hanán, Anán
27 Maluc, Harim niman Baana.
On oksekimej israelitas onotlajtolmakakej para kitlakamatiskej iley Dios
28 Niman on oksekimej israelitas yejuan xotlafirmarojkej (on tiopixkej, on levitas, on tsakuijlotlajpixkej, on nokuikatijkej, on tekichijkej ipan on ueyitiopan, niman nochimej on yejuan yonejkuanijkaj intech on yejuan xchanejkej para cumpliroskej iley Dios, iminuan insiuauan niman nochimej inkoneuan tlakamej niman siuamej yejuan kipiyayaj kuajli kajsikamatilistli) 29 onosentlalijkej iminuan on oksekimej israelitas niman intlayekankauan yejuan otlafirmarojkej. Niman yejuamej onotlajtolmakakej ixpan Dios ika kintlakamatiskej on leyes yejuan Dios okinmakaka itechkopa Moisés, on itekitkau. Niman no onotlajtolmakakej xpan Dios ika nokalaktiaj kiseliskej icastigo Dios tla xnochipa kintlakamatiskej nochi on tlanauatiltin, tlamachtiltin niman on leyes yejuan toTEKO okinmakak. 30 Yejua ika tej, otitotlajtolmakakej ixpan Dios ika tochpochpouan xtikinkauiliskej ma nonamiktikan iminuan on yejuan xchanejkej, nion yejuamej inmichpochuan xtikinkauiliskej ma nonamiktikan iminuan totelpochuan. 31 Niman ijkuak on yejuan xchanejkej* uajlaskej uajtlanamakaskej ijkuak sábado noso san katlejua tonajli ijkuak titlaluichiuaj itech toTEKO, xtikintlakouiliskej. Niman no otitotlajtolmakakej ixpan Dios ika cada chikome xipan xtitôkaskej para ma noseui totlal, niman tikintlapojpoluiskej nochimej on yejuan techuikiliaj.
32 No ijki, otitotlajtolmakakej ixpan Dios para cada xipan tiktemakaskej naui gramo de plata para nokouas tlen notekitiltis ipan iueyitiopan toDios: 33 para on pan tlatiochijtli yejuan kitlaliaj ipan mesa, niman on uentli de trigo yejuan mojmostla kiuentlaliaj, niman on uentli yejuan nochi tlatla yejuan no mojmostla kiuentlaliaj, niman on uentli de yolkej yejuan kintlatiaj para kinuentlaliaj, niman on uentli yejuan kiuentlaliaj ijkuak sábado niman ijkuak yenkuik metstli, niman on uentli para ipan oksekimej iluimej, niman para nochi on sesekneka uentli, niman on uentli ipampa totlajtlakoluan yejuan tiisraelitas, niman para nochi tlen notekitiltis ipan iueyitiopan toTEKO.
34 Niman tejuamej yejuan titiopixkej, niman on levitas niman nochimej on israelitas, otikchijkej suertes ipan tofamilias para cada xipan ipan on tonaltin yejuan ye tikmatstokej kamanon tikiktiskej ipan on ueyitiopan on kojtli yejuan kitlatiskej ipan itlaixpan toTEKO Dios, ijkon ken tlajkuilolnestikaj ipan on ley. 35 No ijki, otitotlajtolmakajkej ixpan Dios ika cada xipan tikiktiskej ipan iueyitiopan toTEKO on achtoj tlakyotl yejuan tlakis ipan totlal niman yejuan tlakis ipan nochimej on kojtlakijlomej. 36 Niman no tikinuikaskej tokoneuan yejuan tlakayenkuiyomej ipan iueyitiopan toDios niman inachtojkoneuan touakaxuan niman toborregos, ijkon ken tlajkuilolnestikaj ipan on ley. Tikinuikaskej inmixpan on tiopixkej yejuan tekitij ipan on ueyitiopan. 37 No otitotlajtolmakajkej ixpan Dios ika tikiktiskej para on tiopixkej ipan on kaltlayejyeualomej yejuan onkaj ipan iueyitiopan toDios on toachtoj harina niman on achtoj tlakyotl de nochimej on kojtlakijlomej. No tikiktiskej on achtoj vino niman on achtoj aceite de olivo. Niman on levitas tikinmiktiliskej todiezmos de nochi on tlen tikpixkaskej, pampa yejuamej kisentlaliaj nochi on diezmos de nochiuiyan kampa titôkaj.
38 Niman ijkuak on levitas yaskej konkuiskej on diezmos* de on tlakyotl, ika onkaj iminuan yas sen tiopixki yejuan kisa intech iuejkakoneuan Aarón. Kemaj on levitas kiktiskej ipan on kaltlayejyeualotin yejuan onkaj ipan iueyitiopan toDios, on diezmo de on diezmos yejuan kisentlaliskej. 39 Ijkon tej, on israelitas niman on levitas ika onkaj kiktiskej on uentli de trigo, de vino niman de aceite ipan on kaltlayejyeualotin kampa yejtikaj on tlajtlamach* yejuan kitekitiltiaj ipan on ueyitiopan niman kampa nemij on tiopixkej, on tsakuijlotlajpixkej niman on nokuikatijkej. Niman otitotlajtolmakajkej ixpan Dios ika nochipa ticuidaroskej on iueyitiopan toDios.