Esdras okinoyolkuitij intlajtlakoluan on israelitas
9
Ipan on tonajli 24 sano ipan on metstli, on israelitas onosentlalijkej para onosaukej. Onotlakentijkej ikan ajmankatlakentli* niman okinotemilijkej tlajli ipan intsontekon. 2 Ijkuakon, onoxelojkej intech inuejkakoneuan on yejuan xchanejkej. Kemaj onotelketskej san sekan niman onoyolkuitijkej de imintlajtlakoluan niman intlajtlakoluan inachtojtajuan. 3 Niman ompa kampa ijkayaj, yeyi hora okinkakistilijkej on tlen tlajkuilolnestikaj ipan on amamoxtli de ileyes toTEKO, iminDios, niman ipan okse yeyi hora onoyolkuitijkej de imintlajtlakoluan, niman okimauistilijkej iminTEKO. 4 Sakin on levitas Josué, Binuy, Cadmiel, Sebanías, Buni, Serebías, Bani niman Quenani, otlejkokej ipan on tlajtlapechtli de kojtli, niman okinotskej chikauak iminTEKO Dios. 5 Kemaj on levitas Josué, Cadmiel, Binuy, Hasabnías, Serebías, Hodías, Sebanías niman Petaías, okijtojkej: “Ma tikueyiteneuakan toTEKO Dios nochipa niman para nochipa. ¡Ma tikyekteneuakan iueyitokatsin niman ma tikmauistilikan, maski toueyiteneualis xkajxilia kech yejuan noneki kiselis ueyiteneualistli!"6 Kemaj, yejuamej ijkin onoueyikatsajtsilijkej: "Tejua titoTEKO, niman xnemi okse más. Tejua otikchijchiu on cielo niman on más tlakpak de on cielo, niman nochimej on sitlalimej. Tejua otikchijchiu in tlaltikpaktli niman on mar, niman nochi tlen onkaj impan. Tejua tikmaka nemilistli nochi tlajtlamach tlen onkaj*. Yejua ika mitsmauistiliaj on angeles ne iluikak.
7 “Tejua toTEKO, tiDios yejuan otiktlapejpenij Abram. Tejua otikixtij ne Ur, kampa inchan on caldeos, niman otiktokayotij Abraham. 8 Otikitak ika yejua, omitsneltokak ikan nochi iyojlo niman iuan otikchiu sen pacto*. Otikijlij ika iuejkakoneuan tikinmakas imimpaís on cananeos, hititas, amorreos, ferezeos, jebuseos niman gergeseos. ¡Niman motlajtol yoticumpliroj, pampa tejua nochipa tikchiua tlen tikijtoua! 9 Tejua otikitak ken tlajyouiyayaj toachtojtajuan ne Egipto, niman otikak ijkuak onoueyikatsajtsilijkej itech on Mar Rojo. 10 Otikchiu uejueyi milagros niman tlajtlamach* tetlatlachalistin para oticastigaroj irey Egipto iuan nochimej itekitkauan niman nochimej yejuan nemiyaj ipan ipaís, pampa sanoyej noueyimatiyaj niman kintlajyouiltiayaj on israelitas. Niman ijki, nochiuiyan sanoyej omitsixmatkej niman hasta aman mitsixmatij. 11 Otiktlajkoxeloj on mar inmixpan yejuamej niman opanokej itlajkotian ipan ojtli yejuan uaki. Pero on yejuan kintojtokayaj otikinapolaktij hasta kampa más uejkatlan, ken sen tetl yejuan onuetsi ipan atl kampa sanoyej uejkatlan. 12 Kemaj otikinyekan ipan tonajli ikan sen moxtli mimiltik, niman ipan yeuajli tikinyekanaya ika sen tlimilinajli yejuan kintlauiluiyaya inojui yejuan nonekiya kinejnemiskej.
13 “Sakin, otiuajtemok ipan on tepetl Sinaí, niman iminuan otitlajtoj desde ipan cielo. Otikinmakak tlanauatiltin yeuan melajki, tlamachtiltin yejuan melauak, niman leyes yejuan kuajli. 14 Otikinnauatij ma kejeuakan on yektonajli sábado, niman otinmakak tlanauatiltin, temachtiltin yejuan melajkej, leyes niman okseki temachtiltin itechkopa motekitkau Mosés. 15 Niman no otikinmakak pan yejuan oualeu ipan cielo para otikintlakualtij, niman otikinmakak atl de on ueyi tetl para oatlikej. Kemaj otikinmijlij ma kinoyaxkatikan on país yejuan otikintlajtolmakak ika motokatsin ika tikinmakas.
16 "Pero yejuamej niman touejkatajuan sanoyej onoueyimatkej niman onotsontekonchikajkej*, niman xokinekkej okintlakamatkej motlanauatiluan. 17 Xokinekkej omitskakkej nion xokinekkej kelnamikiskej on uejueyitlajtlamach* yejuan otikchiu impampa. Sanoyej onotsontekonchikajkej hasta okitenejkej sen tlayekanketl yejuan oksejpa kinuikaskia Egipto ken esclavos. Pero tejua tisen Dios yejuan titetlapojpoluiya, titetlajsojtla, titeiknelia, titeijyouiya niman tikpiya nochi tetlajsojtlalistli*. Yejua ika xotikintlauelkau, 18 Maski okinochijchiuilijkej sen becerro de oro niman okijtojkej ika yejua katka on dios yejuan okinkixtij Egipto, niman sanoyej omitskualanijkej. 19 Tejua, pampa sanoyej titeikneliani, xotikintlauelkau ipan on xalpatlajkan. On moxtli mimiltik xonejkuanij intech ipan tonajli para okinyekan ipan inojui, nion on tlimilinajli xonejkuanij ipan yeuajli para okintlauiluij inojui yejuan nonekiya kinejnemiskej. 20 No ijki, otikinmakak mokuajli Espíritu para ma kajsikamatikan motemachtil. Xkaman okimpoloj on tlakuajli maná yejuan tikinuajtitlaniliaya, niman otikinmakak atl para oatlikej. 21 Ipan nochi on 40 xipan otikintlakualtij ipan on xalpatlajkan, niman xkaman oijsoliu imintlaken nion xkaman oikxipojposajkej.
22 “Otikinpaleuij ma kintlanikan reinos niman naciones, niman otikinxexelouilij imintlal. Niman yejuamej okinoyaxkatijkej on tlajli Hesbón, ipaís on rey Sehón, niman on tlajli Basán, ipaís on rey Og. 23 Otikchiu para ma kimpiyakan sanoyej miyekej inkoneuan kenon sitlalimej yejuan onkaj ipan cielo, niman otikinuajuikak ipan in tlajli para okinoyaxkatikoj, ijkon ken otikimprometerouilij inachtojtajuan. 24 Niman yejuamej okalakkej ipan in tlajli Canaán niman okinoyaxkatijkej. Inmixpan otikintlan on cananeos niman iminreyes yejuan chantiyaj ipan in tlajli. Otikinmaktilij para okinchiuilikej ken yejuamej okinekkej. 25 No, okinnoyaxkatijkej uejueyikalpanmej yejuan kuajli tepanyeualtsakutokej, niman tlaltin kampa kuajli tlatlaki. Okinnoyaxkatijkej kaltin yejuan tentikatkaj ikan miyek tlajtlamach yejuan más kuajli. Niman no, okinnoyaxkatijkej atlaltekontin, uvasyoj, olivojkojyoj niman okseki miyek kojtlakijlomej. Otlakuajkej hasta oixuikej, otojtomajkej niman opakkej de nochi on tlen kuajli otikinmakak.
26 “Pero yejuamej xomitstlakamatkej, xipan omitsitakej niman okichichijkej moley. Niman no, okinmiktijkej motiotlajtojkauan yejuan kinmijliayaj makasa ma tlajtlakokan, yej ma nokuepakan motech. Pero yejuamej más sanoyej otlajtlakojkej. 27 Yejua ika, otikintemaktilij intech intlauelikniuan yejuan okintlajyouiltijkej*. Sakin, ijkuak tlajyouijtikatkaj, onoueyikatsajtsilijkej motech para xkimpaleui, niman tejua, pampa sanoyej titeikneliani, otikinkak desde ne iluikak, niman otikintlalij tlakamej yejuan okinmanauijkej intech on yejuan kintlajyouiltiayaj.
28 “Pero ijkuak kipiyayaj achijtsin yolseuilistli, oksejpa kichiuayaj mixpan tlen xkuajli. Yejua ika, otikintemaktilij intech intlauelikniuan yejuan kinmandarouayaj niman kintlajyouiltiayaj*. Kemaj oksejpa noueyikatsajtsiliayaj motech para xkimpaleui, niman tejua, pampa sanoyej titeikneliani*, tikinkakiya desde ne iluikak niman miyekpa otikinmanauij. 29 Otikinchikajkanautij oksejpa ma kintlakamatikan moleyes, pero yejuamej yej noueyimatiyaj niman xkintlakamatiyaj motlanauatiluan. Xipan kitayaj motlamachtiluan yejuan kinmaka nemilistli nochimej on yejuan kintlakamatij. Xipan omitsitakej, onotsontekonchikajkej niman xokinekkej omitskakkej. 30 Miyek xipan otikinmijyouij, niman miyekpa tikinualijlijtiaya itechkopa moEspíritu niman intechkopa motiotlajtojkauan para maka tlajtlakoskej, pero xokinekkej otlakakkej. Yejua ika, otikintemaktilij intech on naciones de in tlaltikpaktli para okinnoyaxkatikej. 31 Pero pampa tejua sanoyej titeikneliani, xotlan tikimpopoloua, nion xotikintlalkauij, pampa tejua tisen Dios yejuan titetlajsojtla niman titeiknelia.
32 “¡ToDios, tejua tiueyixtikaj niman nochi ueli tikchiua! Nochi tlakatl mitsmakajsi, niman xkaman tikelkaua mopacto*. Nochipa tikpiya moueyitetlajsojtlalis. Xkita ken desde ikuak otechtlankej on reyes de Asiria hasta aman sanoyej yotlajyouijkej toreyes, totlayekankauan, totiopixkauan, totiotlajtojkauan, touejkatajuan niman nochimej on israelitas. 33 Tejua yotitechcastigaroj ken techmelaua, pampa tejua tikchiua nochi tlen melajki. Tejua nochipa tikchiua on tlen tikijtoua tikchiuas.Yej tejuamej otikchijkej tlen xkuajli. 34 Nion toreyes, nion totlayekankauan, nion totiopixkauan, nion touejkatajuan, xocumplirojkej moleyes nion xokintlakamatkej motlanauatiluan. Niman xokinekkej omitskakej ijkuak otikinchikajkaijlij maka tlajtlakoskej. 35 Maski otikinmakak miyek riquezas ijkuak yejuamej reyes katkaj, niman otikinmakak sen país kampa imintlaluan sanoyej kuajli tlatlaki, xomitsmauistilijkej nion xokajkajkej ika kichiuaj tlen xkuajli.
36 “Aman tej, xtechita ika tinemij esclavos ipan in país yejuan otikinmakak touejkatajuan para ma kikuakan nochi tlen kuajli nikan tlaki. 37 Pero nochi on tlen sanoyej tlaki, yej para on reyes yejuan aman techmandarouaj, yejuan intech otitechtemaktilij ipampa totlajtlakoluan. Tejuamej niman toyolkauan techtlajyouiltiaj ken yejuamej kinekij. Yejua ika tej, sanoyej titlajyouiyaj."
On israelitas kichiuaj sen pacto* para kintlakamatiskej on leyes
38 Ipampa nochi yejua in yejuan topan yonochiu, aman tikchiuaj sen promesa ikan nochi toyojlo, niman on promesa tiktlajkuiloltlaliaj ipan sen amatl yejuan kisellaroskej niman kifirmaroskej on totlayekankauan, on levitas niman on tiopixkej.