Esdras okinomachtij on ley
8
Kemaj nochimej on hebreos onosentlalijkej san sekan ipan on plaza yejuan onkaj ixpan on ueyitsakuijlotl yejuan itoka Iueyitsakuijlou Atl. Niman on temachtijketl Esdras okitlajtlanilijkej ma kuajki on amamoxtli* kampa Moisés okijkuiloj on leyes yejuan Dios okinmakaka on israelitas. 2 Ipan on achtoj tonajli de on ika chikome metstli, Esdras, yejuan no tiopixki katka, okiktik on amamoxtli* de on leyes inmixpan nochimej on yejuan onosentlalijkej. Ompa nemiyaj tlakamej, siuamej niman nochimej yejuan kipiyayaj kuajli kajsikamatilistli. 3 Niman desde saniman kualkan hasta tlakualispan, on tiopixki Esdras okinomachtij on amamoxtli* inmixpan nochimej, ixpan on plaza yejuan onkaj ixpan on ueyitsakuijlotl yejuan itoka Iueyitsakuijlou Atl.Nochimej on yejuan ompa nemiyaj kuajli okakkej ken okinomachtij* on amamoxtli de on leyes. 4 On temachtijketl Esdras ijkajtikatka tlakpak ipan sen tlajtlapechtli de kojtli yejuan okichijchijkej para ompa kinomachtis on amamoxtli de iley Moisés. Inakastlan kampa iyekmakopa ijkatikatka Matatías, Sema, Anías, Urías, Hilcías niman Maasías. Niman ipan iopochmakopa ijkatikatka Pedaías, Misael, Malquías, Hasum, Hasbadana, Zacarías niman Mesulam. 5 Ijkuak Esdras okitlapoj on amamoxtli, nochimej onotelketskej pampa nochimej ueliyaj konitstikatkaj. 6 Kemaj Esdras okiueyiteneu toTEKO yejuan nochi ueli kichiua, niman nochimej on yejuan ompa nemiyaj okitelketskej inmauan, niman okijtojkej: “Ma ijki nochiua, ma ijki nochiua.” Kemaj onotlakuantelketskej niman onopachojkej hasta ipan tlajli, niman okimauistilijkej toTEKO.
7 On levitas Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán niman Pelaía, kinmijlijtiayaj on hebreos tlinon kijtosneki on leyes. Niman on hebreos sa tlajtlakaktikatkaj kampa ijkayaj. 8 On levitas chikauak kinomachtiayaj on amamoxtli* de ileyes Dios, kipatlatiayaj niman kinmelajkaijlijtiayaj on tlajtojli ipan imintlajtol on hebreos para kuajli kajsikamatiyaj.{+ a } 9 Niman pampa nochimej chokayaj ijkuak kakiyaj on tlajtoltin de on leyes, nejua Nehemías yejuan nigobernador katka, niman Esdras on temachtijketl niman tiopixki, niman on levitas yejuan kinmijliayaj on hebreos tlinon kijtosneki on leyes, okinmijlijkej nochimej para maka ma najmanakan niman maka ma chokakan, pampa in tonajli ika tlakajtli para toTEKO Dios. 10 No ijki, Esdras okinmijlij: “Xuiyan niman xtlakuatij, xkuakan on tlen más kuajli niman xkonikan vino yejuan tsopelik, niman iminuan xkuakan on tlen nenkipiyaj on yejuan xkipiyaj tlakuajli. Ijkon xchiuakan pampa in tonajli ika tlakajtli para toTEKO. Maka xmajmanakan, pampa on pakilistli yejuan toTEKO techmaka, yejua tochikaualis."
11 On levitas no kinyoltlaliayaj on chanejkej. Kinmijliayaj makasa ma chokakan pampa in tonajli ika tlakajtli para toTEKO. 12 Kemaj nochimej on chanejkej oyajkej otlakuatoj, niman no iminuan okikuajkej on tlen kipiyayaj on yejuan xkipiyayaj tlakuajli, niman otlaluichijkej pampa okajsikamatkej on tlen okinmachtijkej.
Iluitl de on kalmatsitsimej
13 Uajmostla, nochimej on tlayekankej ipan on familias, niman on tiopixkej niman on levitas, onosentlalijkej iuan on temachtijketl Esdras para okinomachtijkej* on tlajtoltin de on leyes. 14 Niman ipan on leyes okinextitoj kampa kijtoua ika toTEKO okinnauatij on israelitas itechkopa Moisés, ika ipan on iluitl yejuan kichiuaj ipan on ika chikome metstli, ika onkaj chantiskej ipan kalmatsitsimej. 15 Kemaj ipan nochimej on kalpanmej niman uejueyikalpanmej niman ne Jerusalén okinmachistijkej on israelitas para ma uiyan ipan campos, ma kitejtekitij kuamatli de on kojtli olivo, arrayán, palmera, higuerajkojtli noso san katlejua kojtli yejuan mayeualtik para kinchijchiuaskej on kalmatsitsimej, ijkon ken tlajkuilolnestikaj ipan on leyes. 16 Niman on israelitas oyajkej okuitoj on kuamatsitsimej niman okinchijchijkej inkalmatsitsiuan tlapani ipan inkal niman ipan inkiauak. Sekimej okinchijchijkej ipan ikiauak on iueyitiopan Dios niman ipan on plaza yejuan onkaj itech on ueyitsakuijlotl yejuan itoka Iueyitsakuijlou Atl, niman no, ipan on plaza yejuan onkaj itech on ueyitsakuijlotl yejuan itoka Iueyitsakuijlou Efraín. 17 Nochimej on israelitas yejuan ouajnokuepatoj Babilonia okinchijchijkej inkalmatsitsiuan niman ompa ochantikej chikome tonajli para on iluitl. Niman sanoyej opakkej ijkuak otlaluichijkej pampa desde ijkuak nemiya Josué, ikoneu Num, xokaman ijkon kichiuayaj in iluitl de kalmatsitsimej. 18 On iluitl para toTEKO okichijkej chikome tonajli. Niman desde on achtoj tonajli hasta kaman otlan, Esdras mojmostla kinkakistiliaya on amamoxtli de ileyes Dios. Niman ipan on ika chikueyi tonajli, onosentlalijkej para otlankej on iluitl ikan miyek paktli para okimauistilijkej toTEKO, ijkon ken kijtoua ipan on tlanauatijli.