Esdras okichiu oración impampa on Israelitas
9
Sakin ijkuak nochi in yopanok, on tlayekankej ouajlajkej notech niman onechijlijkej: “Ezdras, on israelitas iminuan sekimej on tiopixkej niman on levitas, xokintlalkauijkej on yejuan chantij ipan on kalpanmej yejuan onokej nanika nisiu, yej kichiuaj on tlen sanoyej xkuajli. Sanken nouikaj ipan iminemachisuan on cananeos, on hititas, on fereseos, on jebuseos, on amonitas, on moabitas, on egipcios niman on amorreos. 2 On tlakamej israelitas niman intelpochuan yononamiktijkej iuan iminichpochuan on yejuan xisraelitas. Ijkon tej, itlapejpeniluan Dios yononelojkej iminuan on yejuan xisraelitas. Niman on tlayekankej niman on tlapaleuijkej, yejuamej onoyakatsteketskej ipan on tlajtlakojli.”3 Ijkuak ijkin onikitak, oninotlakentetsayan, oninotsonuiuitlak niman oninotentsonuiuitlak pampa sanoyej oninajman. Niman kemaj onotlalij ipan tlajli ikan noyojlo tentikaj ikan ajmanatli. 4 Kemaj nochimej on yejuan kimakajsiyaj icastigo iminDios on israelitas, ipampa intlajtlakoluan on yejuan onokuepkaj achtoj de Babilonia, onosentlalijkej nouan. Ikan ajmantli neuatikatka ipan tlajli hasta ijki oajsik on tiotlak ijkuak kitemakayaj on uentli. 5 On tiotlak ijkuak okitemakakej on uentli, oksejpa oninoyolchikau. Chika sanken* niktlalijtikatka notlaken tsayanki, oninotlakuantelkets niman opeu ninoueyikatsajtsilia ikan nomauan tlakpak itech noTEKO Dios. 6 Ijkin oninoueyikatsajtsilij: “Oh noDios, xnikmati tlinon nikchiuas. Sanoyej nipinaua nimitsnotsas pampa totlajtlakoluan sanoyej yomiyekiyak, hasta yoajsik ne iluikak kampa tinemi. 7 Desde on tonajli ijkuak toachtojtajuan nemiyaj hasta aman, tinemij ipan sanoyej ueyi tlajtlakojli. Niman ipampa totlajtlakoluan, tejuamej, toreyes niman totiopixkauan otechtemakakej ipan imauan reyes yejuan xchanejkej. Otechmajmailijkej, otechuikakej ipan okse país, otechtlachtekilijkej niman otechpijpinajtijkej, niman hasta aman ijkon titlajyouiyaj. 8 Pero maski san achijtsin tiempo otikchiu aman, tejua toTEKO Dios, ikan moteiknelilis otikchiu on tlen kuajli para tejuamej. Otikchiu para sekimej tejuamej ma techmakauakan kampa techpiyayaj ken esclavos para ma titochantikij ipan in yektlajli. Oksejpa otitechkauilij ma tikitakan on tlen kuajli, niman titechmaka on pakilistli para xok tinemij ken esclavos. 9 Maski tejuamej tiesclavos katkaj, tejua xkaman otitechtlalkauij. Yej otitechiknelij imixpan on reyes de Persia. Titechmaka más nemilistli para oksejpa ma tikchijchiuakan moueyitiopan yejuan yoxoxotonka, niman tejua tikmanauiya Judá niman Jerusalén.
10 "Pero aman, toTEKO, ¿tlinon uelis timitsijliskej pampa yotitlajtlakojkej? Xotiktlakamatkej motlanauatiluan, 11 yejuan otechmakakej motlapaleuijkauan on tiotlajtojkej. Tejua otitechijlij ika on país yejuan ipan tikalakiskej niman tiktoyaskatiskej, sanoyej ixpolijtikaj, pampa on yejuan ompa chantij sanoyej tlajtlakouaj. No ijki otitechijlij ika pampa sanoyej xkuajli nouikaj, on país yokitemiltijkej ika nochi on tlen tiktlajyelita. 12 Niman otitechijlij para maka ma tikinkauilikan tochpochuan, niman totelpochuan maka ma nonamiktikan iuan yejuamej inkoneuan. Otitechijlij maka kaman ma tikchiuakan se pacto* de tetlajsojkaiknijtin iminuan, para nochipa tikpiyaskej poder niman tikuaskej nochi tlen kitlakitia on kuajli tlajli. Kemaj on tlajli tikinkauiliskej tokoneuan ken herencia.
13 "Maski tlamach topan yonochiu ipampa totlajtlakoluan, tejua xtitechcastigaroua ken kitocaroua. Yej otikchiu para ma techmakauakan kampa techpiyayaj. 14 Aman tej ¿Oksejpa xtiktlakamatiskej motlanauatiluan niman sanken* tikinnamiktijtiaskej tokoneuan iminuan on yejuan sanoyej xkuajli ken nouikaj? Tla ijkon tikchiuaskiaj, yejua sanoyej tikualaniskia, niman titechpopolos tinochimej. Nion semej tejuamej xok tinemiskia.
15 "ToTEKO Dios de israel, tejua tiyolmelajki. Maski ijki, otikchiu para sekimej de tejuamej ouel otitomanauijkej ken aman nochimej ueli kitaj. Tejuamej melauak tikpiyaj tlajtlakojli mixpan. Yejua ika xuelis tinemiskej mixpan."