On tiopixki Esdras niman icompañeros ajsij Jerusalén
8
In yejua imintoka on tlayekankej intech in familias, yejuan iminfamilias okiskej Babilonia para nouan oyajkej Jerusalén ijkuak Artajerjes rey katka: 2 Gersón. (Yejua katka tlayekanki intech iuejkakoneuan Finees.)
Hatús, ikoneu Secanías. (Yejua katka iuejkakoneu David.)
Zacarías. (Yejua katka tlayekanki itech iuejkakoneuan Paros,
Elioenai, ikoneu Zeraías. (Yejua katka tlayekanki itech iuejkakoneuan Pahat-moab,
Secanías, ikoneu Jahaziel. (Yejua katka tlayekanki itech iuejkakoneuan Zatu,
Ebed, ikoneu Jonatán. (Yejua katka tlayekanki itech iuejkakoneuan Adín,
Jesaías, ikoneu Atalías. (Yejua katka tlayekanki itech iuejkakoneuan Elam,
Zebadías, ikoneu Micael. (Yejua katka tlayekanki itech iuejkakoneuan Sefatías,
Obadías, ikoneu Jehiel. (Yejua katka tlayekanki itech iuejkakoneuan Joab,
niman iuan oyajkej 218 tlakamej.) 10 Selomit, ikoneu Josifías. (Yejua katka tlayekanki itech iuejkakoneuan Bani,
Zacarías, ikoneu Bebai. (Yejua katka tlayekanki itech iuejkakoneuan Bebai,
Jonatán, ikoneu Hacatán. (Yejua katka tlayekanki itech iuejkakoneuan Azgad,
Elifelet, Jeiel niman Semaías. (Yejuamej katkaj sa ika nochi iuejkakoneuan Adonicam,
niman inuan oyajkej 60 tlakamej.
Utai niman Zabud. (Yejuamej katkaj tlayekankej itech iuekakoneuan Bigvai,
niman iuan oyajkej 70 tlakamej.)
On yejuan tekitij ipan ueyitiopan
15 Onikinsentlalij itech on río yejuan yau itech Ahava, niman ompa otokajkej yeyi tonajli. Niman ijkuak onikimpou on tlakamej niman on tiopixkej, xoniknextij nion se levita. 16 Onitlatitlan ma kiminnotsatij Eliezer, Ariel, Semaías, Elnatán, Jarib, Elnatán, Natán, Zacarías niman Mesulam yejuan uejueyitlayekankej katkaj, niman no on temachtijkej Joiarib niman Elnatán. 17 Onikintitlan para ma kitatij Ido, on yejuan tlayekanki ipan on kalpan itoka Casifía. Onikimijli nochi on tlinon niknekiya ma kijlikan Ido iuan on ompa iuan nemij para ma techinuajtitlanilikan levitas para tekitskej ipan iueyitiopan Dios pampa yejuamej yejua imintekiu. 18 Niman ipampa itetlajsojtlalis* Dios, otechajtitlanilikej sen tlakatl yejuan sanoyej tlamatki* itoka Serebías. Yejua katka sen teuejkakoneu itech Mahli yejuan sen levita. Serebías ouajlaj iuan matlaktli uan chikueyi ikoneuan niman ikniuan. 19 No ijki, otechajtitlanilijkej Hasabías niman Jesaías, iuejkakoneuan Merari. Yejuamej ouajlajkej iuan ikoneuan niman isobrinosa. Nochi in tlakamej semoajltin katkaj. 20 No ijki, otechinuajtitlanilijkej 220 ueyitiopantlapaleuijkej. Yejuamej tenuejkakoneuan katkaj intech on ueyitiopanpaleuijkej yejuan on rey David, niman itlapeliuikauan okintlalijkaj para kimpaleuiyayaj on levitas ne ipan ueyitiopan. Nochimej in 220 tlakamej okinmijkuilojkej imintoka ipan sen lista.
21 Kemaj, kampa tinemiyaj nisiu on río Ahava, onitlanauatij sen nesauajli para xotitoueyimatikej ixpan toDios niman para otiktlajtlanilijkej kuajli ma techuika, tejuamej, tofamilias niman nochi on tlen tikiktiyaj. 22 Nejua onipinau niktlajtlanilis soldados niman caballos on rey para ma techmanauikan intech totlauelikniuan ipan toojui, pampa yotikijlijkaj ika Dios kinmanauiya nochimej on yejuan kitokaj, pero kincastigaroua nochimej on yejuan kitlalkauiyaj. 23 Yejua ika tej, otitosaukej niman otiktlajtlanilijkej Dios ma techcuidaro niman okichiu ken otiktlajtlanilijkej.
24 Kemaj onikintlapejpenij majtlaktli uan ome intlayekankauan on tiopixkej. Yejuamej katkaj: Serebías, Hasabías niman majtlaktli inmikniuan. 25 Kemaj imixpan oniktemachiu on oro niman on plata, niman on tlajtlamach* yejuan notekitiltis, yejuan on rey iuan itlajtolpaleuikauan, itlapeliuikauan niman nochimej on israelitas yejuan ompa nemiyaj ne Babalonia okitemakakej para iueyitiopan toDios. 26 On yejuan oniktemachiu niman onikinmakak katka: 21 mil 450 kilos de plata, 100 tlajtlamach* yejuan notekitiltis ipan on ueyitiopan yejuan no de plata, niman 3 mil 300 kilos de oro, 27 20 tazas de oro, cada se yetik katka 8 kilos, niman ome tepostekomatl de bronce yejuan patioj ken oro.
28 Kemaj onikinmijlij: "Nemejuamej nentlakauiltin itech toTEKO, no ijki ken in tlajtlamach* tlakauiltin itech toTEKO. On plata niman on oro yes sen uentli yejuan san tikmakaskej ikan paktli toTEKO yejuan on tlakamej okimakakej ikan nochi inyojlo, iminDios toachtojtajuan. 29 Xkinmaluikan niman xkinmejeuakan hasta ijkuak kintemachiuaskej ipan ikalijtikej iueyitiopan toTEKO ne Jerusalén, imixpan on intlayekankauan on tiopixkej, on levitas niman on tlayekankej intech on familias israelitas.” 30 Kemaj on tiopixkej niman on levitas okiselijkej on plata, on oro niman on tlajtlamach* yejuan okitemachijkej, niman okinmiktikej ne Jerusalén ipan iueyitiopan toDios.
31 Ipan majtlaktli iuan ome tonajli de on achtoj metstli, otikiskej itech on río Ahava para otiajkej Jerusalén. ToDios otechmanauij intech totlauelikniuan niman on tlachtekkej ipan toojui. 32 Ijkuak otajsikej Jerusalén, otitoseuijkej yeyi tonajli. 33 Kampa ika naui tonajli, otiktemachijkej on plata, on oro niman on okseki tlajtlamach* yejuan otikinmiktijkej, ipan iueyitiopan toDios. Nochi otikmakakej on tiopixki Meremot, ikoneu Urías. Ompa iuan nemiya Eleazar, ikoneu Finees, niman on levitas, Jozabad, ikoneu Josué, niman Noadías, ikoneu Binui. 34 Sano ipan on tonajli otiktemachijkej niman otikpojkej nochi, niman okijkuilojkej nochi yejuan otiktikej.
35 Kemaj on yejuan okinuikakaj Babilonia niman sakin* onokuepkej Jerusalén, okintemakakej on yolkej para uentli yejuan tlatlas para iminDios on israelitas. Okitemakakej 12 becerros, 96 borregos, 77 borreguitos. Niman no okinuentijkej 12 chivos, para on uentli ipampa intlajtlakoluan niman ipampa intlajtlakoluan nochimej on israelitas. Nochi in yolkej okinmakakej toTEKO ken uentli yejuan tlatla. 36 Kemaj okitemakakej itlanauatiluan on rey de Persia intech on gobernadores niman on itlapeliuikauan yejuan nemiyaj ipan on región itech on río Éufrates kampaka ikalakiyan tonaltsintli. Niman yejuamej okimpaleuijkej on israelitas niman otlapaleuijkej ipan iueyitiopan toTEKO.