On tiopixki Esdras niman icompañeros ajsij Jerusalén
7
Sankin ijkuak yonochiu nochi yejua in, ijkuak Artajerjes katka rey de Persia, nemiya sen tlakatl itoka katka Esdras. In yejua itlakamekayo katka: Yejua ikoneu Seraías, niman teuejkakoneuan katkaj itech Azarías, Hilcías, 2 Salum, Sadoc, Ahitob, 3 Amarías, Azarías, Meraiot, 4 Zeraías, Uzi, Buqui, 5 Abisúa, Finees, Eleazar niman Aarón, on achtoj tiopixki. 6 Esdras sen temachtijketl katka, yejuan kuajli kajsikamatiya on ley yejuan iminTEKO Dios on israelitas okimakak Moisés. Pampa toTEKO nochipa nemiya iuan Esdras, on rey Artajerjes okimakak nochi tlen okitlajtlanilij. Ijkon tej, Esdras ouel okis ne Babilonia, 7 niman oyaj Jerusalén iuan sekimej israelitas. Sekimej katkaj tiopixkej, sekimej levitas, sekimej on yejuan nokuikatiayaj, sekimej yejuan tlatlapouayaj ipan ueyitiopan niman sekimej yejuan tekitiyaj ipan ueyitiopan. Yejua in onochiu ijkuak Artajerjes kipiyaya chikome xipan ika tlamandarouaya ken rey. 8 Esdras oajsik Jerusalén ipan on makuijli metstli de on chikomej xipan ijkuak Artajerjes otlamandaroj ken rey. 9 Okis ne Babilonia ipan on achtoj tonajli de on achtoj metstli, niman oyekok Jerusalén ipan on achtoj tonajli ipan on makuijli metstli pampa Dios nochipa iuan nemiya. 10 Esdras nochipa nomachtiaya iley toTEKO, niman kitlakamatiya. Niman no kinmachtiaya on israelitas ileyes niman itlanauatiluan toTEKO.Iamatlajkuilol Artajerjes yejuan okimakak Esdras
11 In yejua on amatlajkuilojli yejuan on rey Artajerjes okimakak Esdras, yejuan tiopixki katka niman temachtijketl yejuan kuajli okajsikamat on leyes niman on tlanauatiltin yejuan toTEKO okimmakak on israelitas:
12 "Nejua Artajerjes yejuan más niueyixtikaj rey intech nochimej reyes nimitstlajpaloua tejua Esdras yejuan titiopixki niman titemachtijketl ikan ileyes niman itlanauatiluan on Dios iluikakchanej:
13 "Nejua yonitlanauatij nochiuiyan para nochimej on tiopixkej, levitas niman israelitas yejuan nemij kampa nitlamanaroua, yejuan kinekiskej yaskej mouan ne Jerusalén, uelis yaskej. 14 Nejua niman on chikomemej notlajtolpaleuijkauan timitstitlanij ne Judá niman Jerusalén para xtlachati tla kitlakamatij on israelitas iley Dios yejuan kipiyaj. 15 Xkikti on oro niman on plata yejuan nejua niman notlajtolpaleuijkauan tikmakaj ikan toyojlo iminDios on israelitas yejuan iueyitiopan onkaj ne Jerusalén. 16 No ijki, xkikti on oro niman on plata yejuan tiksentlalis ipan nochi on región de Babilonia, iuan on tomin yejuan on israelitas niman on tiopixkej ikan nochi iminyojlo kinekiskej kitemakaskej para iueyitiopan Dios ne Jerusalén. 17 In tomin ika tlakajtli* tikouas becerros, borregos niman borreguitos, iuan on uentli de trigo niman de vino para kiuentlaliskej ipan itlaixpan* iueyitiopan nemoDios, ne Jerusalén. 18 Niman ika on oro niman plata yejuan nokauas, tejua niman mocompañeros teuikaluan xkitakan tlinon más kuajli nenkichiuaskej ken kineki Dios. 19 Niman on tlajtlamach* tlatiochijtin yejuan yotimitsmakakej para kitekitiltiskej ipan iueyitiopan moDios ijkuak nenkimauistiliskej, tejua xmaktili Dios ne Jerusalén.
20 "Niman tla okseki tlajtlamach* noneki ipan iueyitiopan moDios, uelis kitlaxtlauaskej ika on tomin yejuan kisa ipan itesoro on rey. 21 Niman nejua nirey Artajerjes nikinnauatia on tesoreros yejuan nemij ipan on región ne itech on río Éufrates kampaka ikalakiyan tonaltsintli, para nimantsin ma kimakakan on tiopixki Esdras yejuan temachtijketl ikan iley on Dios iluikakchanej, nochi on tlen yejua tlajtlanis. 22 Uelis kimakaskej hasta 3 mil 300 kilos de plata, 22 mil litros de trigo, 2 mil 200 litros de vino, 2 mil 200 litros de aceite niman nochi on istatl yejuan kitlajtlanis. 23 Nochi on tlen tlajtlanis on Dios iluikak chanej* para iueyitiopan, nimantsin ma kimakakan, para ijki xuajlas nion sen castigo ipan on tlajli kampa nitlamandaroua, niman más sakin* tlamanaroskej nokoneuan. 24 Niman no xmatikan ika yonitlanauatij para nemejuamej tiopixkej, levitas, yejuan nokuicatiaj, yejuan tlatlapojuaj ipan ueyitiopan niman on yejuan tekitij ipan iueyitiopan Dios maka nenkitlaxtlauaskej impuestos.
25 "Niman tejua, Esdras, ika on tlamatkilistli yejuan Dios yomitsmakak, tikinteneuas teyolkuitijkej, niman gobernantes yejuan kichiuaskej on tlen melajki imintech on tlakamej yejuan chantij ipan on región yejuan onkaj itech on río Éufrates kampaka ikalakiyan tonaltsintli. Kijtosneki, imintech nochimej yejuan kixmatij iley moDios. Niman on yejuan xkixmatij iley moDios, xkiminmachti. 26 Niman on yejuan xkitlakamatis iley moDios niman nejua noleyes, ika onkaj nimantsin nenkimiktiskej, nenkixtiskej itech on nemochanejkauan israelitas, kitlaxtlauas multa noso nenkitsakuaskej ipan cárcel.”
Esdras noueyikatsajtsilia
27 Kemaj Esdras ijkin onoueyikatsajtsilij: "Ma kiueyiteneuakan toTEKO, iminDios toachtojtajuan, pampa okichiu para on rey ma kitlakaita iueyitiopan toTEKO yejuan onkaj ne Jerusalén. 28 Niman ma kiueyiteneuakan pampa okichiu para on rey niman itlajtolpaleuijkauan niman nochimej itlapaleuijkauan yejuan más uejueyixtokej, ma nechtlajsojkaitakan. No ijki, ma kiueyiteneuakan pampa yejua nemiya nouan niman onechpaleuij para oniuel onikinsentlalij on israelitas yejuan uejueyixtokej tlayekankej niman kinyolmatoka para nouan ma nokuepakan Jerusalén."