Itlanauatil on rey Darío
6
Kemaj on rey Darío otlanauatij ma kintejtemokan on amamoxtin yejuan yejtikatkaj ne Babilonia, kampa kinmeuayaj nochi on amamoxtin yejuan maluiltin. 2 Niman ipan on palacio de Ecbatana, ipan iueyitlalpan Media, okinextijkej sen amamoxtli* kampa ijkin kijtouaya:3 “Ipan on achtoj xipan ijkuak Ciro rey katka, ijkin otlanauatij ma kichiuakan ipan iueyitiopan Dios ne Jerusalén: 'Oksejpa ma kipeualtikan ma kichijchiuakan on ueyitiopan para ompa tlauentlaliskej. On ueyitiopan kipiyas 27 metros ika uejkapan, niman 27 metros ika patlauak, 4 niman kipiyas yeyi pantli* de temej niman se pantli de tablas yejuan yenkuikej. Nochi on tomin yejuan nonekis, kixtiskej ipan on tomin yejuan onkaj ipan notesoro. 5 Niman on tlajtlamach* yejuan de oro niman de plata yejuan teyaxka* katka ipan iueyitiopan Dios, on yejuan Nabucodonosor okikuika ipan on ueyitiopan de Jerusalén niman okimiktik Babilonia, ma kintemakakan niman ma kinmiktikan oksejpa ne Jerusalén, niman ma kintlalikan ipan iueyitiopan Dios, kampa onkatkaj.” \in 6 Kemaj on rey Darío ijkin okinauatij Tatnai, on gobernador ipan on región yejuan onkaj itech on río Éufrates, kampaka ikalakiyan tonaltsintli, niman Setar-boznai iuan itlapaleuijkauan. Okimijlij: “Nemejuamej xkisakan ne Jerusalén, 7 niman maka xkinteltikan on yejuan kichijchiua iueyitiopan Dios. Yej xkauilikan imingobernador on Judíos niman intlayekauan on israelitas yejuamej ma kichijchiuakan iueyitiopan Dios ne kampa onkatka. 8 Ijkin nitlanauatia nenkimpaleuiskej on tlayekankej israelitas para ma kichijchiuakan iueyitiopan Dios: 'Ika on tomin yejuan ika kitlaxtlauiliaj impuestos on rey, yejuan nosentlalia ipan on región yejuan onkaj itech on río Éufrates kampaka ikalakiyan tonaltsintli yejua ika xtlaxtlauakan nochi kech nonekis para maka noteltis on tekitl. 9 Niman on tiopixkej yejuan nemij ne Jerusalén mojmostla xkinmakakan nochi tlen yejuamej kinekiskej, tla becerros, borregos, borreguitos para kimakaskej uentin yejuan tlatlas on Dios iluikak chanej, trigo, istatl, vino noso aceite. 10 Ijkon kimakaskej on Dios iluikak chanej* uentin yejuan kipaktis, niman no notlatlautiskej ipampa nonemilis niman ipampa innemilis nokoneuan.
11 "Niman no nitlanauatia ika tla yakaj xkitlakamati notlanauatil, ma kixtikan sen kojtli* ipan ikal, niman ipan ma kitlalaktikan niman ma kixoxotonikan ikal.' 12 Niman Dios yejuan okitlapejpenij Jerusalén para ompa onyas iueyitiopan kampa kitlakaitaskej itokatsin, yejua ma kixoxotoni san akin rey noso nación yejuan kinekis kiteltis in tlanauatijli noso kinekis kixoxotonis iueyitiopan Dios yejuan onkaj Jerusalén! Nejua nirey Darío yonikijtoj in tlanauatijli. Ijki ma nochiua nochi ken yonikijtoj."
Otlan kichijchiuaj on ueyitiopan
13 Kemaj Tatnai, on gobernador ipan on región yejuan onkaj itech on río Éufrates kampaka ikalakiyan tonaltsintli, niman Setar-boznai iuan icompañeros, okichijkej kuajli nochi on tlanauatijli yejuan okitemakak on rey Darío. 14 Ijki tej, on tlayekankej isrelitas ouelkej sanken* okichijkej on tekitl ipan on ueyitiopan, ijkon ken kiminyekanayaj on tiotlajtojkej Hageo niman Zacarías ikoneu Ido. Niman on ueyitiopan otlan kichijchiuaj ijkon ken otlanauatij iminDios on israelitas, niman ken otlanauatij on rey Ciro, Darío niman Artajerjes, nochimej yejuan katka reyes ne Persia. 15 On ueyitiopan otlan kichijchiuaj ipan on yeyi tonajli de on metstli Adar, ijkuak kuikaya chikuasen xipan ika Darío rey katka ne Persia.
16 Kemaj on israelitas: on tiopixkej, on levitas niman on oksekimej yejuan okinuikakaj Babilonia, okitiochijkatlalijkej ikan miyek paktli on iueyitiopan Dios. 17 Ijkuakon okiuentlalijkej 100 becerros, 200 borregos niman 400 borreguitos. Niman no okiuentlalijkej 12 chivos ipampa intlajtlakoluan nochimej on israelitas. Yejuamej okitemakakej sentetl ipampa cada tribu* israelita. 18 Kemaj on tiopixkej okinmakakej tekitl. Cada se okitlalijkej kamanon kitocaroua tekitis. Niman on levitas no okintlalijkej kampa kintocaroua tekitiskej para kimauistiliskej Dios ne Jerusalén. Okichijkej ken tlajkuilolnestikaj ipan on amamoxtli* yejuan okijkuiloj Moisés.
Okichijkej on iluitl Pascua
19 On israelitas yejuan kimpiyayaj ken esclavos ne Babilonia niman onokuepkej Jerusalén, okichijkej on iluitl Pascua ipan on tonajli matlaktli uan naui de on achtoj metstli. 20 On tiopixkej niman on levitas yonochipajkaj ixpan Dios. Kemaj on levitas okitemakakej on uentli para on iluitl Pascua impampa nochimej on yejuan okinuikakaj Babilonia, impampa on tiopixkej yejuan incompañeros, niman pampa sano yejuamej. 21 Nochimej on israelitas yejuan okinuikakaj Babilonia, okikuajkej on tlakuajli de on iluitl Pascua iminuan nochimej on oksekimej chanejkej ipan on región de Judá yejuan okitlalkauijkej on tlen xkuajli yejuan kichiuaj on naciones yejuan xkineltokaj Dios. 22 Chikome tonajli okichijkej ikan paktli on iluitl de on panes yejuan xkipiya tlaxokolilistli* pampa toTEKO sanoyej okimpaktij ika okauilij on rey de Persia okimpaleuij para oksejpa okichijchikej iueyitiopan Dios, iminDios on israelitas.