Oksejpa kichijchiuaj on ueyitiopan
5
On tiotlajtojkej Hageo niman Zacarías, ikoneu Ido okinmijlijkej on judíos yejuan nemiyaj Judá niman Jerusalén on tlen okinmijlij iminTEKO Dios on israelitas. 2 Kemaj Zorobabel, ikoneu Salatiel, niman Josué, ikoneu Josadak, oksejpa opeu kichijchiuaj iueyitiopan Dios, ne Jerusalén. Niman on itiotlajtojkauan Dios nemiyaj iminuan para kimpaleuiyayaj. 3 Pero Tatnai yejuan gobernador katka ipan iueyitlalpan on río Éufrates kampaka ikalakiyan tonaltsintli, niman Setar-boznai iuan incompañeros, ijkin okinmijlitoj: “¿Akinon omechnauatij oksejpa xchijchiuakan in ueyitiopan niman xketsteuakan itepan? 4 ¿Kenijki imintoka on tlakamej yejuan kichijchiuaj in kajli?” 5 Pero pampa Dios kimpaleuiyaya on tlayekankej israelitas, xouel okinchiualtijkej ma kiteltikan san chika on tlapaleuijkej de Persia kimachistiaj on rey Darío niman kichaskej tlinon kijtos ipan sen tlajkuilolamatl.6 Kemaj Tatnaí, yejuan gobernador katka ipan iueyitlalpan on río Éufrates kampaka ikalakiyan tonaltsintli, niman Setar-boznai iuan icompañeros yejuan itlapaleuijkaluan on gobernador okititlanilijkej on rey Darío sen amatlajkuilojli. 7 On amatlajkuilojli ijkin kijtouaya:
“Rey Darío, timitstlajpalouaj. 8 Timitsmachistiaj, tejua ueyixtikaj rey, ika otiajkej ipan iueyitlalpan Judá, niman otikitakej iueyitiopan on ueyixtikaj Dios yejuan oksejpa kichijchiuaj ikan uejueyi temej yejuan tlaxintin, niman ipan on tepantli kintemaj tirantes. On tekitl kijsikachiuaj niman xouij kichijchiuaj. 9 On tlayekankej intech on israelitas otinkintlajtoltijkej akinon okinnauatij oksejpa ma kichijchiuakan on ueyitiopan, niman ipan on tepantli ma kintlalikan kojtin* tomajkej. 10 Niman otikintlajtoltijkej kenijki imintoka on yejuan kiyekanaj on tekitl para tikijkuiloskej imintoka, niman ijkon timitsijliskej akinomej. 11 Niman yejuamej ijkin otechnankilijkej: “Tejuamej tikmauistiliaj on Dios iluikak chanej* yejuan no nemi ipan in tlaltikpaktli, niman oksejpa tikchijchiuaj on ueyitiopan yejuan ye uejkaui okichijchijka sen ueyixtikan rey israelita. 12 Pero pampa on toachtojtajuan sanoyej okualanijkej on Dios iluikak chanej, yejua, okintemaktilij itech Nabucodonosor on Caldeo yejuan rey katka de Babilonia. Yejua okixoxotonij on ueyitiopan niman okinuikak on israelitas ne Babilonia. 13 Más sakin*, ipan on achtoj xipan, ijkuak Ciro tlamanarouaya ken rey ne Babilonia, otlanauatij oksejpa ma kichijchiuakan in iueyitiopan Dios.
14 “No ijki, otlanauatij ma kixtikan on tlajtlamach* de oro niman de plata yejuan on rey Nabucodonosor okuika ipan on ueyitiopan ne Jerusalén niman okitlalij ipan itiopan ne Babilonia. Kemaj on rey Ciro okinmakak Sesbasar on tlajtlamach* on yejuan okalaktijka gobernador. 15 Kemaj, on rey Ciro okinauatij Sesbasar ma kikui on tlajtlamach* niman ma kinkauati ipan iueyitiopan Dios, ne Jerusalén. Niman no okinauatij oksejpa ma kichijchiua iueyitiopan Dios sa no ompa kampa onkatka. 16 Yejua ika, Sesbasar oyaj Jerusalén niman okichijchiu icimiento iueyitiopan Dios. Desde ijkuakon opeu kichijchiuaj on ueyitiopan, pero hasta aman xe tlamij kichijchiuaj.”
17 "Aman tej, tejua ueyixtikaj rey, timitstlajtlaniliaj tla tikita kuajli, xtlanauati ma kitejtemokan ipan on amamoxtin kampa tlajkuilolnestokej on reyes de Babilonia. Ijkon tej, tikmatis tla melauak ika on rey Ciro otlanauatij oksejpa ma kichijchiuakan iueyitiopan Dios ne Jerusalén. No ijki, timitstlajtlaniliaj tejua ueyixtikaj rey, xtechmachisti tlinon tikneki tikchiuaskej ika in tlen yotimitsijlijkej."